Human sa paniudto ubos niining dakong punoan sa Mangga,Si Takyo ug Biting nagkalingaw sa panagsultihanay mahitungod sa nagkalainlaing mga tigmo ug mga tanghaga.
TAKYO : Niay akong tanghaga nimo,Bay Biting ambot makasulbad ka ba kaha niini.
BITING( Usa ka Bol-anon.Nangigham): Aw, aho lang gong suwadyan.
TAKYO : Kon ako Bay Biting niadtong una kong asawa nakabaton mig unom ka anak,sa ikaduha pod nakong asawa aduna kami upat,ug karon sa ikatulo ko na nga asawa duna mi 5, unsa man?
BITING : Kasadyon ba diay anang pangutana mo,Bay.Aho man dayon nang matubag.
TAKYO : Tubaga lagi,sayon man kaha bi.
BITING : Aw, kana kay daghan kag anak, sa laktod nga pagkasulti, uwagon!
Nagkadaiyang mga pasiaw nga mopakatawa kaninyog molingaw. Magmabulokon ang inyong paghanduraw nga mokabig sa kadasig aron manuyhakaw ang kalipay diha sa nagmasulub-on ninyong kasingkasing. Pagmaya,ug ang kalibotan moduyog kanimo! (Paapas: Gitikgitik nga sa English as a joke or, a simple comedy).Ang mga ngalan sa tawo,dapit o sitwasyon nga nia dinhi mugna lamang sa naglatagawng imahinasyon, wala tuyoa ug sulagma lang kining nagamit sa taghikay.(ronie m. catadman, writer)
Walang komento:
Mag-post ng isang Komento