RESULTAS PAGKA LIMTANON

 IKTOY :  Naunsa man kanang dawonggan nimo ,Soy nga pulos man na paso?

 TUSOY : Napaso ni gumikan  sa  akong pagka limtanon,Toy.

  IKTOY:  Mao ba? Unsang pagkahitaboa god?

  TUSOY : Nahitabo ni niadtong gisugo kos  akong asawa nga maoy mamalansa ba  sa  among mga sinena.

  IKTOY : Unya?

  TUSOY: Sa  akong pagka limtanon inay ang akong selpon maoy  idaitol  sa  akong dawonggan dihang  may nanawag ,nalimot ko nga ang plansa  man nuon nga akong gigunitan maoy akong gibutang  sa may dawonggan!

   IKTOY : Pagka sakita man ana!

   TUSOY : Mao lagi!

   IKTOY  : Unya,nganong duha man na ka dawonggan nga may paso?

   TUSOY  : Unsaon,  ang animalng dako  nga nanawag  man  pag-usab!

DILI MAO PAGSABOT

 PANYANG (Midip-ig  sa  dughan sa  iyang bana): Abi nimo,Dong  Pasyo may namatidan ko  sa  bag-o  natong silingan  nga nakapakilig  kaayo nako.

 PASYO ( Naikag): Unsa  man na,Day Pans?

 PANYANG : Matag  lakaw  anang  bana padulong  motrabaho mohawok gyud na  sa iyang  asawa.Unya, kon mahibalik  na sab ni gikan  sa trabahoan dad-an  niyag  buwak  ang  iyang  asawa.

 PASYO : Yamat ra. Mao  ba?

 PANYANG: Bitaw,Dong  Pasyo. Unya, makahimo  ka  ana?

 PASYO ( Nakugang):  Ha? Di  ko uy!

 PANYANG ( Nasagmuyo) : Ngano god?

 PASYO  : Wa  tawon  ko makaila anang babayhana. Hipatyan pa nuon  ko  sa  iyang bana!

 PANYANG: Ngeeh!