Sabado, Marso 26, 2016

NASAYOP SA PUASA

KARYA :  Naguol kong naghunahuna  sa nahitabo ni Ikoy,Mare niining buntaga.
CIANA  :  Ngano man diay ,Mare, unsa may nahitabo?
KARYA :  Kini laging "puasa",Mare kay holy week  .
CIANA(Naghinamhinam nga masayod)  :  Ngano lagi,Mare?
KARYA  : Wa lagi mi mangaon kay magpuasa. Mao tong nagkutaw ra mig kape...
CIANA   : Unya,Mare?
KARYA  : Unsa bang pagka-unsaa,Mare nga ang akong nahatag ni Ikoy,dili man diay to kape.
CIANA   : Unsa man diay,Mare?
KARYA  : Hilo man diay para ilaga,abi kog kape!
CIANA   : Sus ,da lagi!

GIBASLAN

TIKYO : Naunsa man  nang imong hitsura,Bay Isyot nga subo man kaayo?
ISYOT  : Ning "mahal nga adlaw" nahinumdom lang ko sa gisulti sa atong Ginoo.Bay.
TIKYO : Unsay gisulti  sa Ginoo,Bay  nga nakapahinumdom nimo?
ISYOT  : Matod pa Niya : " kon labayon kag bato sa imong kaaway,baslan mo kinig tinapay!"
TIKYO : Mao gyud! Unya?
ISYOT  : Naguol ko,Bay.
TIKYO : Ngano man?
ISYOT  : Niadto gong miaging adlaw nga nagkaaway mig akong silingan nga si Andot, iya man kong gilabay ug bato gumikan sa iyang kasuko dire nako.
TIKYO : Unya?
ISYOT  : Mao to nga gumikan sab sa akong kalagot ako sab siyang gibaslan ug labay...
TIKYO : Aw diay? Unya,unsa may imong gibawos ug labay ngadto niya,Bay?
ISYOT  : Sa akong kalagot,Bay gibaslan lagi nakog labay.
TIKYO  : Unya?
ISYOT   : Aw, napahak gyud ang ulo ni Andot   uy ,pagkaigo sa atsa nga akong gilabay ug tua pa ron sa Ospital!
TIKYO  : Butangi!

WA KABANTAY

Samtang naminaw sa mga mamumulong sa "siete palabras",maoy namatikdan ni Egnoy ang iyang katapad nga si Koing nga daw sa nahimuot ang panagway nga nagtan-aw kang Ekong nga maoy nagpalansang diha sa krus.
EGNOY (Misikdo sa kilid ni Koing): Bay Koing, ngano ka nga nahimuot ka man nga nagtan-aw kang Ekong nga nagpalansang diha sa krus?
KOING (Nagngisi) : Wa ko kapugong  sa akong kahimuot nga nagtan-aw kang Ekong,Bay  uy.
EGNOY                  : Ngano man lagi, unsa may hinungdan?
KOING                   : Nakabawos ra gyud kong Ekong.
EGNOY                  : Kay ngano man?
KOING                   : Gikawat man god nako ang iyang hiniktan,ug wa siya ka bantay kay nagbitay naman na siya diha sa krus!
EGNOY                  : Ngee!

SUWERTE HINUON

BITOY : Haskang bugoa gyud nimo,Bay nganong nangasawa ka man anang Minyak nga mbdos man nang daan ug dili ikaw maoy amahan?
ETOT   : Suwerte hinuon ko.Bay.
BITOY (Nahibulong): Nganong nakasulti kaman ana,Bay nga suwerte ka?
ETOT   : Ang ang nga gipahibawo naman kong daan sa doktor nga di gyud ko makapaanak.
BITOY : Da lagi!

DAGHANG HALIDE

OTOY     : Nganong mobalhin ka man,Tong sa imong relihiyon?
BITONG : Gilaayan ko,Toy.
OTOY     : Unsa may nakalaay ana,Tong? Niadto saksi ka,ug karon mitapon ka sa Katoliko?
BITONG : Maayo dinhi  sa Katoliko,Toy kay daghang Holidays. Inig ka tawo sa Diyos,halide ug inig kamatay sab sa Diyos halide man sab gihapon!
OTOY     : Butangi!

Huwebes, Marso 24, 2016

MOKAON GIHAPON

IKTOY  : Karon nga" Semana Santa " naman ,Bay Boloy gidili na ang pagkaon ug baboy alang sa mga kristiyanos.
BOLOY : Aw, o. Unya, kay dili man ko kristiyano?
IKTOY   : Mokaon ka diayg baboy?
BOLOY  : Mokaon god, apan dili sab mahimo.
IKTOY   : Ngano man?
BOLOY  : Wala may naninda ron ug potahe sa baboy!

SUYOP GIHAPON

TIBOY(Nagpadungogdungog) : Kon ako karon dunay kuwarta dili  na gyud  ko magpakabuang  ang suyop-suyop uy.
IKYOT (Nakabati) : A, yamat ra?
TIBOY                   : Ang akong kuwarta ipalit ko na lang ug inasal,pero suyop gihapon!
IKYOT                   : Ingon ka wala nay suyop?
TIBOY                   : Wa  na bitaw.
IKYOT                   : Kana diayng ingon nimo nga mopalit kag inasal , unya suyop pod?
TIBOY                   : Mopalit lagi kog inasal,pero suyop man sa mantika! Ang ang, naa diay nay sabaw ang inasal ?
IKYOT                   : Butangi!

Martes, Marso 22, 2016

SULBAD

Maoy  nakita ni Pekto sa dihang nahilabay kini sa panimalay nilang Onyot nga naghinuktok ning naglingkod sa kawayang lingkoranan diha sa atubangan.
PEKTO (Mitimbaya): Uy, sayo pa gani sa buntag,Bay Onyot hinuktoktok man dayon. Unsay problema?
ONYOT(Miyanghag): Wala na magpakita nako ang akong uyab,Bay nga si Juliana.
PEKTO  (Miduol kang Onyot): Ngano man,Bay?
ONYOT      : Nakasaad man god ko niya,Bay nga ako siyang palitan ug singsing niadtong milabayng  Martes atol sa iyang birtdi.
PEKTO       : Unya, mao ra nay iyang hinungdan nganong wala na siya magpakita  nimo?
ONYOT      : Daghan naman god kog saad niya,Bay di lagi matuman kay  usahay walay kuwarta unya makalimot sab ko. Karon, ako siyang giteksan nga magkita mi, dili motubag.
PEKTO       : Sayon ra na,Bay.
ONYOT      : Unsaon man ani nako ron,Bay.
PEKTO        : Pangasaw-a  na lang nas Juliana.
ONYOT       : Unya, sulbad diay na?
PEKTO        : Nganong dili man masulbad nga kon imo siyang saaran ikaw namay iyang pangitaon.
ONYOT       : Bitaw no?
PEKTO        : Pangitaon gyud ka niya,Bay aron sukmatan nga ikaw maoy bana niyang bakakon.Unya, dayong hapak sa binugha sa imong nawong!
ONYOT       : Butangi!

Lunes, Marso 21, 2016

NASAYOP

Sa kadugayan naminyo ra gyud si Ikong nga maoy giilang "guwang ulitawo" sa ilang dapit sa Sityo Kulo. Apan sa adlaw sa iyang kasal pwerte niining huboga, hinungdan nianang pagkabuntag sayo kining naghukdong sa bakanan sa hagdan nga nag-ungaog pa ang ulo. Taudtaod, giduol kini ni Angkay nga iyang bag-ong naasawa.
IKONG  : Bakakon gyud nimo,Kay uy.
ANGKAY (Nahibulong): Nganong nakasulti ka man niana,Kong nga bakakon ko?
IKONG   : Ingon ka nga birhen ka pa? Unya, diay,sus!
ANGKAY (Naglagot) : Hoy  animal, ayg kog ingna ana, ha! Ikaw maoy hanggaw!
IKONG (Naglagot na sab): Nganong hanggaw man ko?
ANGKAY   : Ang ang didto kaman makatulog sa kwarto sa akong Lola ka gabii gumikan sa kahubog,amaw!
IKONG  : Butangi!

DUBOK GYUD

Usa ka  buntag niana nga nanuroyg isda  si Apyot.
ANOY ( Mitimbaya) :  Unsa nang isdaa nga gisuroy mo,Pyot?
APYOT                     :  Katambak ni Bay Anoy. Lab-as  pa kaayo ni.
ANOY  (Misuling  sa isda) : Lab-as god nga lubog na man kaayo nig mga mata,dubok na ni no?
APYOT                               : Di ko manuroyg dubok nga isda,Bay uy, lubog tan-awon nang mata sa isda kay bag-o pa man nang mata!

ESPELING

ANTOY   : Unsa mang isda,Totske ang tulo  ang ulo bi?
ETOT       : Binuang naman nang imo,Toy. Naa diay isda nga tulo ang ulo?
ANTOY   : Naa, uy!
ETOT       : Unsa man kuno bi?
ANTOY   :  Kana diayng bodboron.
ETOT       : Aw, motuo ko basta imong i-wrong spelling!

WAY ULO

ETOT : Unsang isdaa,Bay Antoy nga walay ulo?
ANTOY : Ayg binuang,Bay. Naa ba goy isda nga walay ulo?
ETOT     : Naa uy.
ANTOY : Unsa man kuno bi?
ETOT     : Kanang gihimong sardinas diay!

WALA MAKATUBO

ONGOT : Hibulong ko nimo,Anot nga wala man ka katubo?
ANOT    : Nailo man god ko sa akong mga ginikanan,Bay Ongot. Walay nagpadako nako gikan sa gamay pa kong pagkabata...
ONGOT : Unsa may labot ana sa imong pagka-unano  ug sa pagkawala na nimoy mga ginikanan?
ANOT    : Mao gani. Walay nagpadako, kita ka bitawng wala ko motubo!
ONGOT : Butangi!

MALINAW GIHAPON

BOTOY : Didto sa among lugar,Bay Insot linaw kaayo bisan ang mga tawo didto pulos mga bagis ug maldito.
INSOT   : Wala diay away?
BOTOY : Walay away didto,Bay. Kon dunay magpaisog-isog pinatyanay dayon kay matag tawo didto dunay takin nga tag-as kaayong pinote!
INSOT  :  Yamat ra?  Unya, unsaon pagkalinaw didto kon sige lag pinatyanay?
BOTOY:  Aw, di man pod, malinaw ra man.
INSOT  :  Nus-a man pod maglinaw?
BOTOY : Aw, kanang magbaid na sila sa ilang mga pinote!

WALA DIAY

Gisugo ni Edot ang iyang apo nga si Tikyo pagpapalit ug tabako sa tindahan ni Inse  Akay.
Sa didto na sa tindahan ang bata.
TIKYO : Papalita kog sigarilyo,Inse Akay.
INSE AKAY : Unsang  sigarilyoha?
TIKYO         :  Dyakpot.
INSE  AKAY: Wala mi ana.
TIKYO         :  Aw, Mayte lang.
INSE AKAY:  Wala mi ana.
TIKYO         : Aw, Malboro na lang.
INSE AKAY : Nahutdan na. Wala mi  ana.
TIKYO         :  Tabako na lang.
INSE AKAY : Wala mi manindag tabako,Dong Tikyo.
TIKYO          :  Aw, sigarilyo na lang.
INSE AKAY  : Butangi! Di ta maghuman!

Biyernes, Marso 18, 2016

MOBAWOS

POLDO   : Maoy gikasabotan didto sa  miteng nga gihimo sa atong kapilya kagahapon,Bay Tikyo nga ikaw maoy modala sa papel  sa atong Ginoo nga magpalansang sa krus karong sunod semana didto  sa  Sityo Tiklob.
TIKYO (Nahibulong) : Ako gyud,Bay Poldo, si  Etot diay? Di ba siya may midala sa papel sa atong Ginoo   sa miaging tuig nga pagpasakit?
POLDO   : Mibalibad na si Etot,Bay Tikyo ug ikaw maoy girekomendar niya.
TIKYO    : Hibawo nako nganong iyang  kong  girokemendar,Bay Poldo.
POLDO   : Ngano man?
TIKYO    : Morag mobawos sab ug bunal nakong tonto  da   kay pwerte man nakong nakabunal niya niadtong miaging tuig nga siya pa ang nag-pagginoo-ginoo!
POLDO   : Butangi!

DILI MOHUNONG

KARYA : Angay na lang nga niining  Semana Santa, Rang nga magpuasa sab ka.
PORANG : Di gyud na na ko mahimo,Karya.
KARYA    : Nganong dili  ka man makahimo,Rang?
PORANG : Ang ang nga di man sab mohunong akong bana sa iyang pagpamabaye!
KARYA    : Ngek!

Miyerkules, Marso 16, 2016

NAA RA SA SULOD

PO2  TIKBOY : Unsang pagkahitaboa nga nakawat man ang imong biseklita,Landoy?
LANDOY        : Nahibulong bitaw ko,Sir kay ako man nga gikandadohan ang akong biseklita ug didto pa gyud nako gibutang  haduol  sa among sala.
PO2 TIKBOY  : A, diay ba.
LANDOY        : Nagduda ko,Sir nga insayd dyab gyud ning nahitabo.
PO2 TIKBOY  : Ngano man nga nakasulti kag ingon niana,Landoy?
LANDOY        : Ang ang ,Sir nga pagkawat sa biseklita didto man sa sulod sa among balay wala man didto sa gawas.
PO2 TIKBOY  : Butangi!

Biyernes, Marso 4, 2016

ANG NAMATYAN

TAKYO : Unsay namatyan ni Iyok,Bay?
BOTYOK:  Nasakit man god si Iyok ,Bay ug kanser sa baga.
TAKYO   :  Yamat ra. Abi ko man tog..
BOTYOK:   Unsa,Bay?
TAKYO   : Abi man god to nakog wa nay baga si Iyok sa pagpunay niyag panigarilyo!