NAKAKITAG PAAGI

Si Iktoy nga  usa ka banang seloso  nanawag sa selpon ngadto sa iyang asawa nga si Birhenya.
IKTOY (Nanawag pinaagig selpon): Day Birhenya, asa  man ka karon?
BIRHENYA  (Paraygon ang tingog): Dia ra god sa atong balay, kay ngano man?
IKTOY  : A, oki, naa ka man kaha diha sa atong balay,aber padungga ko sa imong pagkablit  sa kwerdas sa akong gitara bi.
BIRHENYA  : Sus, kana lang diay. ( Tuod man gikablit sa asawa ang gitara). Trinnnggggg!
IKTOY          : O,sige. Naa  gyud diay ka sa atong balay.
Apan nianang pagkataudtaod nanawag na sab si Iktoy.
IKTOY  (Nanawag pinaagig selpon): Day Birhenya, asa ka man ron?
BIRHENYA (Paraygon gihapong mitubag): Sus, nimo, Dong Iktoy dia god sa atong balay.
IKTOY  : Mao ba? Aber, padungga kuno ko bi nga imong patingogon ang akong drum .
BIRHENYA  : Kana ra diay? Nia, o (Gipatingog  ang dram): Tong! Tong!
IKTOY          : Aw, oki.
BIRHENYA  : Tenk yo.
Apan nianang  pagkataudtaod  midalikyat gyud pag-uli  si Iktoy sa ilang balay. Wala didto ang iyang asawa sa iyang paghiabot. Didto ang iyang anak nga kinamanghuran nga si Milot.
IKTOY (Nangutana sa anak): Hain man diay si Mama nimo,Dong Milot?
MILOT  : Nilakaw man to ,Pa.
IKTOY  : Asa man to siya paingon?
MILOT  : Wala man ko kahibawo,Pa. Nagdala  man to sa imong gitara ug naglugdo  pod sa imong dram!
IKTOY (Nahibat  ang kalimutaw): Butangi!