Maoy nakita ni Pekto didto sa suok sa evacuation center ang iyang higala nga si Ontoy nga naghinuktok unya sa matag karon ug unya kalit sab motindog diha sa iyang gilingkoran nga bangko ug dayong panghupaw. Iya ning giduol.
PEKTO : Nahibawo kong gikaguol mog maayo kining atong nadangatan ron,Bay,pero kalma lang god.... Daghan bitaw tang nahiagom niining kabangis sa bagyo ron.
ONTOY (Medyo kahilakon): Tinuod na,Bay. Pero naguol ko pag-ayo kay naguba gyud ang among balay nga maoy bunga sa akong paghagog panarbaho didto sa gawas. Wa na gyuy haligi nga mibarog bisag usa.
PEKTO (Miam-am ug milakbit ug pangomedya): Ay na lang nag kagul-i,Bay, bahalag naguba ang balay basta naa gihapon ang imong asawa.
ONTOY(Milugmaw na ang luha): Guol gihapon ko,Bay.
PEKTO : Unsa pa may kagul-an mo nga naa pa man ang batan-on mong asawa?
ONTOY: Bay Pekto ang pagpangitag bag-ong asawa bisan wa kay kuwarta basta kugihan kang moamoral sayon ra, pero Bay...ang balay.
PEKTO : Ngano man,Bay Ontoy?
ONTOY: Ang balay,Bay Pekto dili gyud ka makakitang mobarog basta wala kay kuwarta!
PEKTO : Butangi!
Walang komento:
Mag-post ng isang Komento