MAO GIHAPON

 KARYA:  Ang  akoa  unyang pinaskohan,Bay Taloy  ha? Hapit  nang  Pasko baya.

TALOY:  Aw,  o.  Nanghatag ba kog pinaskohan ninyo niadtong  milabayng Pasko?

KARYA: Wa  lagi. Karon na!

TALOY: Aw, o lagi karon mao  gihapon!

KARYA: Ngeeh,tihika nimo,Loy  uy!

SUGOT NGA MAY KONDISYON

TAKYO :Ang gikasabotan didtos  among pag-meeting,Bay Temyong nga ang imong kanding maoy ihawon sa  atong reyunyon  karong  umaabot Disyembre.

TEMYONG: Yatis  ra. Ang ako gyud tawong kanding ang inyong nahunahunaan,Bay?

TAKYO: Maoy suhestiyon  sa  kadaghanan,

TEMYONG: Sige,sugot  na   lang  ko. Pero, naay kondisyon.

TAKYO: Unsa man na?

TEMYONG: Pag-meeting mog usab kon kinsay  inyong pabayron!

TAKYO: Butangi!

ANG PAMISTAHAN

ONDOY : Pista na ugma,Bay.

TAKYO  : Bitaw. Asa man unya ta mamista?

ONDOY : Aw, mamista ta adto sa ilang Abay Brenda  kay dakog hikay. Pwede pod adto tas ilang Mareng Melda-Kokoy.

TAKYO : Di lang ko Bay,mauwaw ko.

ONDOY: Mauwaw  man ka nga pista man. Adto ta.

TAKYO: Dili lang ko,Bay. Adto lang mi sa ilang Sir Mercado.

ONDOY : A,pagka garbo god nimog pamistahan nga adto man gyud sa ilang Sir Mercado.

TAKYO: Kaila diay kang Sir Mercado?

ONDOY : Nganong dili god ko makaila nga nahimo man nang huwes  sa  atong Siyudad .

TAKYO: Aw, dili,Bay.

ONDOY: Kinsa man diay na siya? Asa man ang  ilaha?

TAKYO: Naa ra man ila sulod  sa  "public  market'!

ONDOY: Ngeeh!

AYG PANGILAD

ONTOY (Nakamatikod sa tawong naglago ang pamiste nga gasigeg hangad  sa poste.Miduol): Brod,unsay gisigeg  hangad nimos poste?

TAWONG  LAGO : Gitan-aw nako  ,Brad siga  bang  suga.

ONTOY (Nahibulong):  Pagngon man  god nang suga,Brod  basta  panahon  sa  adlawan. Sa gabii ra na magsiga.

TAWONG  LAGO (Miyamiid): Ayg pangilad,Brad.

ONTOY : Wa man ko mangilad.

TAWONG  LAGO : Unsay  imong pagtuo,mosiga nang suga panahon  sa kagabhion bisan pondedo?!

ONTOY: Butangi!