KARYO: Duna lang koy nalibgan ning balaod mahitungod sa pagtapoktapok karon sa mga tawo,Bay Dencio.
DENCIO: Nganong naglibog man ka,Bay?
KARYO: Ingon sila distansya aron malikayan ang takod sa kobid.
DENCIO: Mao gani.
KARYO: Unyag dunay rally sa mga kandidato magduotay man lagi!
DENCIO: Ngee!
PATINDOL : Karong adlawa,misaka na sab ang presyo sa gasolina,Bay Takyo.
TAKYO : Mao bitaw. Magsige gyud na.
PATINDOL : Problema kaayo ni Bay, kay mosaka man sab ang presyo sa tanang mga palaliton. Maglisod na kog full tank sa akong sakyanan ani.
TAKYO : Ako Bay, di gyud ma-problema ana.
PATINDOL : Ngano man,Bay?
TAKYO : Wa man koy sakyanan!
PATINDOL : Butangi!
KADOY : Karon nga sige pa ang gubat sa Ukraine ug Russia,padayon sab nga misaka ang presyo sa gasolina. Pagkapait kon mao na gyud ni kanunayng mahitabo,Syok.
BOSYOK : Bitaw,Bay. Miapektar sa tanang mga palaliton ang pagsaka sa gasolina.
KADOY : Tinuod na. Pero tan-aw kong Atok siya ra ang wa maapektohi,Bay.
BOSYOK : Wa god? Ngano man?
KADOY : Tan-awa ra god nas Atok. (Mitudlo kang Atok nagsandig sa poste nga nagsigeg katawa).Wa gyud na maapektohi!
BOSYOK : Bitaw.May sekreto na siya nga wa gyud na maapektohi.
KADOY : Nasayran na ang iyang sekreto Bay.
BOSYOK : Unsa man kuno bi?
KADOY : Kanang iyang pagka boang!
Sundan tas Dakuykoy nga nanghingusog nas iyang pangampanya kay magpapili sa pagka konsehal dinhi sa ilang lungsod sa Barungoy.
DAKUYKOY : Ayaw baya gyud tawon ko ninyo kalimti ha sa pagpili isip Konsehal dinhi mga taga Sityo Bato sa panahon nga eleksyon.
DENCIO (Miwarawara sa iyang walang kamot didto lang sa kilid nagtindog nagbitbit ug Kulafo): Siguro kaayo na,Koy!
OLDOK: Unya,Koy makatabang kaha ka aning among problema ron nga naghitak man dinhi sa among Sityo ang pamaligyag ilegal nga droga?
DAKUYKOY : Aw,basin unya na puhon Bay Oldok.
OLDOK : Nganong nabasin man,Koy?
DAKUYKOY : Unahon sa nakog sulbad ning akong problema sa naprenda kong balay ug yuta ning akong pag kandidato!
DENCIO (Misukarap kay nahubog na!): Butangi
INGGOT : Karong umaabot nga eleksyon,Doy kang Temyo ta ha sa pagka mayor. Unya, ang atong ibutang sa pagka bise si Maday . Siya lang ang atong i-bise mayor bisan tua nis laing partido Dugmok nahisakop.
KADOY : Siguro kaha ta ana,Got? Klaro kaha ang atoa ana pod?
INGGOT : Ay,klaro lagi. Ako na god ni!
KADOY : Murag way klaro nang imo,Got da. Mas motuo pa kong Melyo kay ka nimo.
INGGOT : Ngano man,Doy?
KADOY : Ang ang buta man ka,unsaon man nimo pagka klaro sa botaran,kon imo kong madala maduha na tang mga buta ani?
INGGOT : Ohoyy!
BOTOY : Ugma kay eleksyon naman gyud tagsatagsa ninyo nga nia karon dinhi, tagaan kog tagsa-ka-libo! Iboto gyud ko ha nga mamahimong konsehal sa atong lungsod.
TAKYO ( Misigang mata sa kalipay): Kana da!
BOTOY : Pero kay nahutdan man ang bangko sa ilang pondo kay gihurot pagwidro sa ubang politiko,kini lang sensilyo nga gikan sa gibuak kong alkansiya maoy akong ihatag ninyo..
TAKYO ( Mipasar sa pagreklamo): Yamat kabug-at god ana isulod sa among bolsa,Toy? Way gyuy papel diha?
BOTOY ( Napikal ngadto kang Takyo): O,diay papel. (Mitunol sa ginisi nga bondpaper ngadto kang Takyo).
TAKYO : Uy,unsa god ni?
BOTOY: Ingon ka papel? Imoha na na.
TAKYO: Yay!
Mipadayag si Turagsoy kang Berto nga usa sa mga kandidato sa Team Aguk-ok nga magpapili pagka konsehal sa ilang lungsod karong Mayo mahitungod sa ilang problema.
TURAGSOY : Bos Berto. mangayo unta mig tabang nimo sa among problema dinhi sa Sityo Duhaypusod. Haskang paita tawon namo dinhi.
BERTO (Naikag): Unsa man kana,Bay Turagsoy?
TURAGSOY : Kini bang mga tawo dinhi,unsaon man ni sila pagbadlong o pagsumpo nga dili unta patakag igwad bisan asa panahon sa kagabhion. Unya,nia poy daghang kanal sa tubig nga samot nagpabaho sa among palibot ug gipuy-an nas daghang lamok!
BERTO : Aw kana lang diay,Bay Turagsoy. Ato nang sulbaron,unya puhon.
TURAGSOY : Aw, dili diay mahimo nga karon na dayon Bos Berto?
BERTO (Nangigham pasumangil kay gagilok ang tutunlan): Ehhm. Dili pa man god tawon siguro Turagsoy kon modaog ba unya ko pagka konsehal!
TURAGSOY (Nangawot sa ulo): Ngeeh,butangi!
Diha sa nahimong 'pulong-pulong' sa Team Bagdok ,mipabuhagay kini sa ilang mapasaligong tinguha ang tagsatagsa ka mga kandidato kabahin sa ilang pagpapili sa umaabot nga eleksyon sa Mayo.
OLDOK (Nangutana) : Kon ugaling Boss Onyot , ikaw ang mapili sa pagka Mayor,makasulod kaha mi bisan hain namo sa city hall?
ONYOT (Mapasigarbuhong mitubag): Way duhaduha nga makasulod gyud.
Unya... miabot ang eleksyon,ug sulagma nga napili si Onyot sa pagka mayor. Miadto dayon si Oldok aron sa pakigkita sa Mayor.
OLDOK : Ingon ka Mayor sa nangampanya ka pa nga kon mahimo na gyud kang Mayor, makasulod mi dinhi city hall?
ONYOT (Nga karon Mayor na): Tinuod na.
OLDOK : Pasudla mi,Mayor.
ONYOT: Nakasulod na bitaw ka dinhi sa City Hall.
OLDOK: Pasudlon ko nimog trabaho ba?
ONYOT: Aw kana .Wa man nimo klaroha niadtong nangampanya pa ko?Ingon ra man ka nga gustong mosulod sa city hall kon mahimo nakong Mayor!
OLDOK (Nangawot sa ulo): Butangi!
Nagkaguliyang ang katawhan mahitungod sa nahimong gubat sa Rusya ug Ukraine. Lainlaing mga nahimong opinyon ang atong madungog mahitungod niining maong hitabo. Paminawon nato si Otoy ug Atok sa ilang estoryahanay.
OTOY : Grabeha ron sa gubat sa Ukraine Bay Atok daghan nang patay.
ATOK : Lagi,maoy pu'ong sa mga nakakita sa telebisyon ug sa internet.Bay.
OTOY: Unsa kahay buhaton aron paundangon na kining gibuhat ni Presidente Putin?
ATOK : Sayon ra gyud unta,Bay.
OTOY : Yamat ra! Unsaon man?
ATOK : A,basta kuhaon lang kanang P sa kang Putin,makita naman ang dag-anan kay modagan man na sa kauwaw! Hunong nang gubat.
OTOY(Miagik-ik): Butangi!
