DILI NA MOANGKON

Gumikan sa  kusog nga hangin sa bagyong Odette ,ang dakong punoan sa Mangga nga nagsambilay sa daghang bunga diha  sa kilid sa may koral,  naapil sab  pagkatumba. Nianang pagka buntag nga milurang na ang bagyo,maoy nakita ni Karya ang ilang silingan nga ataka kaayo sa pagpamunit sa mga mangga nga didto mituasik sa ilang nataran . Misurok sa kalagot si Karya.Ug,unya...

KARYA : Uy,uy!  Naunsa na, amo baya nang mangga nga natumba,ug nganong kamo may nanghipos  sa mga bunga! Iuli na dire kay  aron dili ta mo ikeha ha!

PORANG (Mihunong  sa pagpamunit sa mangga): Grabiha! Milagpot naman ni dire  sa  among tugmaran,kuhaon pa gyud nimo Karya?!

KARYA : Uy,bisan na kay bunga na sa among Mangga! Ibalik na dire!

PORANG (Mitudlo sa mga sagbot ug daghang basura nga nabanlas sa tubig gikan sa ilang Karya): Unya, kanang basura nga gikan man na sa inyo,kuhaa sab na!

KARYA(Miyamiid): Uy,uy  inyoha na  na! Way nahangol!

ANG GANAHAN

 KULASA : Unsay ganahan nimo kon moabot na  ang buwan  sa Pebrero,Day Karya?

KARYA    : Ganahan kos petsa katorse kay Balentayns De.

KULASA; Mao ba? Ako dili,ari kos petsa kinse.

KARYA : Ngano man ,Day Kulasa?

KULASA: Tinghatag mas suweldo!

BISAN PAY WAY UYAB

 TAKYO : Nindot  ning Adlaw  Sa  Gugma  kon duna tay uyab.

MANDOT: Kon way uyab diay,Kyo?

TAKYO  : Way kaparaygan  kay wa may uyab.

MANDOT : Ako Kyo,oki lang  way uyab basta dunay pay tindahang  kaparaygan  sa  utang!

TAKYO    : Butangi!

ANG IHATAG

 ARYANG : Karon kay Balentayns  De  man Yot, unsa imong ihatag nako?

ONYOT    : hatagan ta na lang kag manok,Yang.

ARYANG: Grabe sab.

ONYOT  : Ang ang man lagi  kon hatagan tika ning itlog!

ARYANG: Yaay!

WAY DISTANSYAHAY

TIKYO : Naunsa naman tawon ning mga tawo nga nagduotay man? Wa may sosyal distansing .

KARYO ( Nakamatikod sa reaksyon ni Tikyo): Naunsa ka diha,Kyo ? Ayg hinayhinay diha kay niana ang mga kandidato sa Pundok  Bus-ok!

TIKYO(Wa makapugong ,misinggit): Uy,mga amigog amiga palihog mag distansyahay ta!

PERONG (Usa sa mga kandidato): Ayg kabalaka,Kyo!

TIKYO (Miyanghag ngadto kang Perong nga mikandidato pagka konsehal): Ngano man Konsehal?

PERONG: Mopalayo ra una nang  kobid basta makamatikod nga dunay ayuda!

TIKYO : Yaay!!!

NAUSAB

 KARYA (Sayo nga nagtagawtaw niining buntaga sa iyang bana) : Hoy bana kong animal bangon na diha! Taspokan kaayo ka wa gyud kay nahimo sa imong kinabuhi!

MUKLO (Nakamata sa kabanha ni Karya): Naunsa ka Karya ,nga sayo ba nimong ga putakputak diha di uroy ka maikog sa mga silingan  nato diha nga nangatulog pa hangtod niining higayona! Paghilom diha!

KARYA (Misamot) : Hilom sa imong kalimutaw nga nagsiga,layas dinhi kay wa kay kapuslanan! Tan-awa ni ron wa tay malung-ag kay gihurot na pod nimog pusta ang dyutay mong kuwarta anang sugal! Layas!

MUKLO (May nahunahunaan) : O,molayas ko!Magpakuyog kog lain tawo!

KARYA : Uy, animal kinsa may imong iuban sa espedyo nga magpakuyog ka man?

MUKLO : Magpakuyog ko karon ug laing tawo aron kobrahon ko kadtong nadaog nakos lotto sa resulta ka gabii!

KARYA ( Nahilom makadiyot.Unya...): Uy,Muklo pagtarong diha ha! Nakailis na ra ba ko dire!

MUKLO (Mitukiki ug katawa) : Butangi!