OTOY : Unsay trabaho mo karon,Ding?
CARDING: Nag-online seller ko,Bay.
OTOY : Maayo nang trabahoa? Kinsay nagtabang nimo ana?
CARDING: Gitabangan kong Mr. Wang.
OTOY : Si Mr. Wang nga tag-iyag Mall?
CARDING: Pasalamat ngani siya nako kay kusog pa akong online.
OTOY : Mao ba?
CARDING: Mga tawo di na ganahan moadtog Mall labinag way bakuna,maong sa online na lang sila kay ihatod pas ilaha ang butang!
OTOY : Butangi! Tuod no?
BITOY : Nagpa-baksin ka na ,Log?
MULOG: Gaduha-duha pa ko,Bay.
BITOY : Na, dili gyud ka makasulod ug Mall anang kahimtanga.
MULOG : Ngano gong dili?
BITOY : Wala man kay baksinisyon kard nga ikapakita. Di ka kasulod ,ug dili ka makapalit sa gustong paliton.
MULOG : Ngano gong dili?
BITOY : Dili lagi.
MULOG: Ngano gong maghagohago kog adtos Mall nga naa may daghan sa online nga ideretso paghatod sa akong balay!
BITOY : Butangi!
POLIS ( Misinggit ngadto kang Pablo): Blo,buhii nang imong gihostid aron dili ka madisgrasya!
PABLO( Mibawos ug singga-ak): Dili ko,unsay imong pagtuo esi boy ko?
POLIS : A, di man.Buhii lang lagi nang imong gihostid.
PABLO: Dili ko,ako ning patyon basta magpaduol ka pa!
POLIS (Naratol): Aw, kon maoy imong gusto!
Dihang kalit misinggit ang babaye sa kasuko.
BABAYE : Uy, animal imo na lang kong ipapatay dire,abi naa ka nay kabit didto sa kampo?!
POLIS : Butangi!
* Hostage
Sa dihang nahiabot si Carding nga gikan sa iyang trabaho nangutana dayon kini unsay sud-an ngadto kang Karya nga iyang asawa.
CARDING : Unsay sud-an ron nato Karya ,nga hilabihan ra ba tawon nako nang gutoma,paghukad na.
KARYA (Nga didto sa kuwarto) : Uy,Ding nagbuskad na ra ba ko direg banig.
CARDING (Nagpangawot sa ulo): Na, giatay na ! Buwad pinikas ra man gihapon maoy sud-anon!
BODOY : Ikawng banggiitang kawatan dinhis baryo Candugso,Abloy unsang hitabo nga nadakpan ka naman gyud ron sa mga Polis?
ABLOY : Sipyat ra.
BODOY: Unsa man nang maong sipyat?
ABLOY: Nalimot kong dunay CCTV!
PORANG : Hunong na nianang sige mog inom,Yong makadaot nas lawas.
GOYONG: Makadaot god?
PORANG : Di ka motuo nga kadtong atong kumpare nga si Islaw namatyan ato tungod sa inom?
GOYONG: Ba diha,uy! Inom god nga ang namatyan adto ulser man moinom man nga dili na mokaon!
PORANG : Ngeeh!
KARYO : Nganong wa man nimo tubaga si Mukloy,Tong nga gisayonan ra man to nimo?
BITONG : Wa na lang,Bay Karyo magpaubos lang god para walay mahimong away.
KARYO : Kon ako pa kadtong iyang gikasab-an ingon niadto,suklan gyud nako siya! Maayo gyung suklan ang mga tawong ingon ana!
BITONG: Mao sab.
KARYO : Unsay iyang pagtuo sa iyang kaugalingon nga dili nako suklan. Unsa siya espesyal tsayld?
TONYO: Kumosta ron dinha sa inyong Bay Tikyo dagko bang bawod?
TIKYO: Ngano man diay,Bay?
TONYO: Naay bagyo nga umaabot ,ug dire sa among nahimutang isla makita na namo ang mga dagkong bawod nga milampornas sa daplin sa baybayon! Kumosta naman diha sa inyo?
TIKYO: Wa may bawod dire.
TONYO: Yatis ra? Kakusog ron sa hangin wa gyud mobawod diha?
TIKYO: Unsaon man pagbawod dire nga dia man mis bukid magpuyo?!
TONYO: Butangi! Aw,O no?
