GIBINOANGAN

 BOTOY : Kita ra gyuy gi-tonto aning mga Insek,Loy.

OLOY : Nganong nakasulti ka man niana,Toy?

BOTOY : Hunahunaa ha, ang bayrus ron hinungdan  sa pandemya ,didto gikan sa ila...

OLOY   : O,bitaw.

BOTOY: Unya,panagang  sa bayrus,himo silag 'face mask',palit pod ta.

OLOY : Unya.

BOTOY : Himo silag,'face shield' namalit pod dayon ta.

OLOY : Bitaw.

BOTOY : Himo na pod kuno silag herbal nga tambal, mopalit sab gihapon ta.

OLOY : Unya?

BOTOY : Kinsa may boang ron aning kahimtanga halos gikan nila ato mang gipakyaw,di tan-awa sige ila negosyo,kita nagkalisod na!

OLOY : Butangi!

MAY LABOT

FELIMON :  Matod pa bitaw  sa panultihon nga Iningles: " Ignorance  excuses  no one."

OTOY :         Nakadungog sab ko ana,Mon. Ngano man?

FELIMON :  Dili katuhoan  sa tanang panahon.

OTOY :        Ngano man lagi?

FELIMON : Kuha mog ngano nga karong dunay gipangdakop tungod nga walay 'face mask' naa may gipasagdan lang nga wala maggamit ug mask.

OTOY       : Duna ba diay?

FELIMON: Kana diayng mga Badjao nagsuroysuroy sa kadalanan nag-'mask 'diay na ,nga wa man ang uban? Wa diay na silay labot kay di ignorans!

OTOY      : Ngeeh!

IPAHIPOS SAB

 OLDOK : Kon makasupak sa 'quarantine protocol' Bay Akoy  duna ra bay dakong multa,nya prisohon pa.

AKOY : Yamat ra?Tinud-on kaha na nila?

OLDOK: Aw, tinud-on gyud para dili mokuyanap pagmaayo nang bayrus nga makamatay!

AKOY : Murag duhaduha kos pagtuo,Dok.

OLDOK: Ngano man?

AKOY  : Wa man god nila panumbalingag hipos nang mga libod-suroy mga boang sigeg bahisbahis  sa atong mga kalsada, unsa sila way apil?

OLDOK : Butangi!

ANG NAKA MAAYO

 TAKYO : Dili maayong iminyo rong panahona  kay nia  tas pandemya.

OTOY    : Sayop ka Bay,karon nuon maayong iminyo.

TAKYO : Ngano man?

OTOY:     Kon magminyo gamay nag gasto kay ang kaslonon na lang maoy moatubang  sa pari o huwes ba nga mokasal nila wa nay daghang manguyog.

TAKYO : Unya kon magkasal kinahanglan mag kombera?

OTOY : Na samot kansel nang kombera kay gidili nang tapoktapok kon mahibaw-an mayg  dili madakop!

TAKYO: Butangi!