DILI NA MANGITAG LAING GASTO

BOTOY: Daghana  ninyog iro nga binuhi,Yok.
PAYOK: Mo lang! Dakog  gasto pakaon ug mga iro,Toy.
BOTOY: Gipakaon kaha na nimo ang imong mga iro,Yok nga naagian ko man to silang nangay-ag adtong mga plastik sa basura didtos eskina Patisoy?
PAYOK: Unsay imong pagtuo nga wala nako pakan-a nga tagtagurha man gani ka kilong ganador maoy akong lung-agon para lang nila?!
BOTOY: Mga daot man lagi? Nya namasura pa gyud!
PAYOK: Na bahala na sila mangita  sa ilang  'dessert' adtos  basurahan,unsay imong pagtuo ako pay mogasto?
BOTOY: Butangi!

PAREHISTRO

TIKYO : Nagparehistro ka na didto  sa opisina  sa COMELIC,Bay Sidro?
SIDRO : Dili nako mousab  sa pagparehistro,Bay.
TIKYO : Ngano man ?
SIDRO : Mura man gihapon dili man ko makadaog kon dunay eleksiyon!
TIKYO : Ngee!

WALAY ANGKAS NA

BOSYO: Sunod semana,Bay Intoy dakpon nang mga motor nga angkas.
INTOY :  Yamat ra,unsa god nang balaora?
BOSYO:  Maayo na.
INTOY :  Unsay nakaayo  anang  balaora para nimo?
BOSYO:  Dili na pwede  makaangkas akong asawa  nga pwerteng abubho-ana dire sa akong luyo!
INTOY :  Butangi!

LABING MAAYONG MASIN

LOLO PANGKOY : Tsiks  boy ka man gyud Rito, unsang klaseha sa makina o masin ang akong gamiton aron mobalik ang nindot nga porma sa  akong lawas,nya akong madani ang mga guwapang babaye?
RITO : Pagka sayon ra gyud ana,Lolo Pangkoy.
LOLO PANGKOY : Unsa man lagi nga masin, akong gamiton?
RITO : Aw, gamita imong ATM Machine Lo, di ba panilap gyung tsiks  nimo labinag  mowidrow kag daghang kuwarta!

NABANGGAN

OTOY : Way suwerte si Etot,Bay Asyong nabanggaan  sa awto niadtong miaging adlaw.
ASYONG: Unya,patay?
OTOY     :  Wala man sab. Wala man gani garas iyang lawas.
ASYONG(Nahibulong): Yamat ra? Unsang pagkahitaboa?
OTOY   :  Remot ra man diay tong awto nga duwaan nga  nakabangga niya!
ASYONG: Animel!

MAMISTAHAY

TAKYO : Adto tas piyesta ugma,Bay Inggot  sa Kanturatoy.
INGGOT: Asa man ta mamista?
TAKYO  : Adtos ilang Akoy.
Mao say pag-agi ni Akoy diha  sa ilang tungod nga nakadungog sa ilang gipanagsultihan.
AKOY (Misagbat) : O, adto mo.
TAKYO: Aw, o ikaw man god diay ni,Koy? Adto lagi mi ugma...
AKOY : Sige,pangadto mo. Sayo lang mo...
TAKYO : Aw, sayo gyud mi...unsay imong ihawon,Koy?
AKOY  :  Aw, ikaw maoy akong ihawon kay ikaw may mosayo!
INGGOT : Butangi!

HAKOG NGA HARI

HARING KUGTONG : Ministro Kugmo,aber suroya kuno didto ang dapit  diin didto mibuto ang bolkan. Susiha kon unsa nay gipangkaon sa mga tawo didto nga nabiktima sa trahedya.
Tuod man,mituman dayon ang ministro. Dihang nahibalik na kini sa gingharian, miatubang dayon kini sa ilang Hari.
MINISTRO KUGMO: Mahal nga Hari Kugtong luoy kaayo ang mga tawo didto kay ang ilang gipangkaon mga ilaga naman nga kutob  sa ilang makita!
HARING KUGTONG : Unsa? Unsang pagkahitaboa, wala na ba gayod silay makitang ilang mamahimong kan-on?
MINISTRO KUGMO : Wala na gyud mahal nga Haring Kugtong.
HARING KUGTONG : Kon mao,paanhi-a dinhi sa gingharian kining mga tawhana.
MINISTRO KUGMO;   Matuman mahal nga Haring Kugtong. Ato ba silang tagaan ug mga sinakong bugas nga naa sa atong bodega,mahal nga hari?
HARING KUGTONG : Dili.
MINISTRO KUGMO(Natingala): Nganong paanhion pa man nato kining mga tawhana?
HARING KUGTONG : Akong ipadakop kanila ang mga ilaga nga naa sa atong bodega nga sigeg pangitkit sa mga sako anang atong mga bugas!