GIGANAHAN

LOLO KURYOT  : Sa tanan nakong apo,ikaw  ra gyud, Yoy  ang akong giganahan.
PAYOY                 : Ngano man ,Lo  nga singgaak  pang Lola Aryang, tapolan  man ko . Dili masugo!
LOLO KURYOT : Mao nay akong giganahan.
PAYOY                : Ganahan diay ka,Lo  sa  akong pagkatapolan?
LOLO KURYOT : Wala. Giganahan lang ko nimo kay di ka kahibawong molihay sa akong dukol!
PAYOY                : Butangi!

DILI MAKABOTAR

MUKLOY : Kinsay  imong botaran sa  umaabot  nga eleksiyon,Dro, si Onyot  ang kandidato  sa PDP o,si Kanor nga naa sa Pwersa  Kombate?
PEDRO      : Wala  koy  botaran  ana nila,Bay Mukloy.
MUKLOY  : Uy, kaanugon   nganong  dili kaman   mobotar?
PEDRO      : Mo lang.Unsaon  man nako pagbotar dinhi nga didto man ko  sa laing dapit marehistro!

DILI PATAS

PAYOY : Murag  maaprobahan  na  ang balaodnon,Yok  nga ang edad  sa  usa  ka batan-on dose anyos mamahimo na kining  mapriso  dayon  kon  makasala.
OYOK : Yatis ra. Dili na makataronganon, Yoy.
PAYOY : Nganong  dili man makataronganon,Yok?
OYOK   : Dose  anyos ka bata pa ana,samtang kon ikaw otsenta  anyos  dali nuon  maabsuwelto!
PAYOY : Ngeek!

RE-ENAKMIN

BOLOY: Nganong gatapok nang mga tawo  sa unahan,Syot?

ISYOT:  Ayda , duna man kunoy  reenacment  sa  nahitabong  pag-ambos  niadtong politiko  dihang dapita mao sab nga naay daghang polis.

BOLOY: Pagkahanggaw  god!

ISYOT  : Nganong  nahanggaw  man?

BOLOY: A, sila ray   gabuotbuot  ug re-enakmin  wala nila imbetaha kadtong mga tawo  nga mao  gyuy  mi-ambos!

ISYOT : Ngeeh!

SAYOP GIHAPON

ONTOY (Naghilak) : Bisan unsa na lang nga  akong himuon para  ninyo,Tay Abloy  sayop ko.
ABLOY (Mialam-alam  sa  anak): Nganong nakasulti  ka  man  niana,Toy. Pinangga  ka kaayo namo  ni  Nanay Tikya  nimo.
ONTOY : Unya,  sa dihang miingon  ko ninyo  nga motanaw kog sine,mibalibad  mo?
ABLOY : Nasayop  ka ,Toy  ang amo lang nga tingaleg  madisgrasya ka kon motan-awg sine  adto  sa  Siyudad.
ONTOY ( Misamot  sa  paghilak): Da, nasayop  na pod!

WALAY NADALA

MISS TABAGHAK  : Ugma kay  duna man tay  cooking  activities  tagsa tagsa kaninyo  akong sangonan nga magdala ug lain laing matang  sa  utanon.
MGA BATA :Yes,Mam!
MISS  TABAGHAK : Ikaw ,Tikyo  maoy  akong sangonan nga magdala ug lubi  aron maoy  atong  itono  sa  mga utanon  unya.
TIKYO : O,Mam.
Nianang  pagkasunod adlaw.
MISS  TABAGHAK : O,Tikyo  nganong wala  ka man magdalag  lubi  nga  atong magamit   sa pagtono?
TIKYO : Dili  pwede,Mam.
MISS  TABAGHAK : Nganong  dili  man pwede,Tikyo?
TIKYO : Nagbantay  naman god ang tag-iya  sa iyang kalubin-an!

DILI MAKATAKOD

DOKOY : Nganong gahinuktok ka ,Klo?
TIKLO : Duna koy HIV,Koy.
DOKOY(Dakong kahikurat): Ha? Mananakod na!
TIKLO  : Dili man.
DOKOY: Unsa goy  dili?
TIKLO  : Nganong  manakod man,nga HIV   ra man. Nga, ang  akong  buhok nagka-anamg kawagtang,uy.    Hair  Is  Vanishing,amaw!
DOKOY : Butangi!

MAY KATARONGAN

Ang  moagi  nga mga  sakyanan  sa  usa  ka taytayan  sa  Barangay  Tikwang ang mga tag-iya  niini  pabayron  agig  toll  fee.

TIGBANTAY  ( Misuna) : Bayad  kag singkuwenta pesos,Sir kay  nagmotor  ka man.
TIKYO (Angkas  sa  iyang motor): A,bisan  gitaya  na gani ning akong motor,pabayron  gihapon?
TIKBANTAY : Aw, mao man nay among pamaagi  dinhi,Sir ayna  lag  reklamo.

Tuod  man mibayad  na lang si Tikyo  para wala  nay  samok.Ang  sunod  nga miagi  si Ontoy  nga may biseklita.

TIGBANTAY : O,ikaw, Brad  bayad kag  bayente  pesos nagbiseklita  ka man.
ONTOY (Nagpangawot  sa ulo kay  wala makadalag  kuwarta): Yamat ra sab  ani ron wala  baya ko makadala  direg  kuwarta.
TIGBANTAY : Aw,sayon  ra  sab na,dili ka makaagi.

Mobalik na lang unta   si  Ontoy  sa iyang agi,  apan may  milakdop  nga  paagi  diha  sa  iyang  hunahuna.

TIGBANTAY : Unya,Brad naa ka nay ibayad?
ONTOY (Nagpasukosuko): Nganong  mobayad man ko!
TIGBANTAY : Mao man nay  among  patakaran  dinhi.
ONTOY : Nganong   mobayad  man ko nga  wa man ni nako sakyi akong biseklita, tan-awa  ako naman ning gilukdo!
TIGBANTAY : Yaayyy!

ANG PAGTUO

IKOY      : Kita  kos  wan tawsan  pesos  nga  gilabay  adtong tawo  nga nahilabay kaganiha  dinhi.
BOKYO : O,nganong wala man nimo punita dayon?
IKOY     : Lisod,Bay.
BOKYO : Imo pa gyung  puniton  nga gibasura  na gani  sa tag-iya.
IKOY     : Unyag  gibasura? Aw, basin peke to.
BOKYO : Mao  gani. Unsay  iyang pagtuo,  garbage  collector  ko!

ANG GISALIGAN

TAKYO(Midakol  sa ulo ni Otoy); Ugmm! Nganong imong gisumbag  ang akong manghod  nga  si Delyo,Toy? Kinsay   imong gisaligan?
OTOY  : Wala, uy!
TAKYO : Tan-awa  tong nawong  ni Delyo,mihuboy. May gisaligan ka no?
OTOY (Naglagot na): O,duna. General , akong Tiyo.
TAKYO (Mikalma) : Aw, heneral diay  sa army,Toy  imong Tiyo?
OTOY  : Dili.
TAKYO : Asa man siya nahimong general?
OTOY   : Siya  ang Postmaster General!

DILI MAHIMONG KALIMTAN

TALINO (Miduol  sa higala nga naghukdong  sa bangko ubos   sa kahoyng Santol): Naunsa ka,Bay  nga naghinuktok  kaman  dinhi?
BOTOY : Lisod  gyud   kon ato nang  mahikalimtan  ang kagahapon,Bay Talino no?
TALINO(Mialam-alam  sa higala):  Sus, kon mapait    nga kagahapon  na,  maayo  gyud  nang  kalimtan! Pasagdi  ug  hikalimti na kana.
BOTOY : Dili  mahimo,Bay  kinahanglan gyud  nga akong hinumdoman  ron.
TALINO : Ngano  man?
BOTOY  : Di unya ko kapasar  sa  among  history  class!
TALINO : Ngeeh!

MAMALIK

ONYOT (Nagsakay  sa  habalhabal); Hunong   una ta dinhi,Bay  kay  nag-ulan  man dinhi  sa paghitungod  nato  sa Baryo  Marigondon  nga padulong pa ra ba  ta  sa Cordova. Mangabasa  ta ani  ron.
DRAYBER  SA  HABALHABAL : Bitaw. Aw, dili lang ta mohunong , Bay diay  maayong  paagi  ay.
ONYOT  : Unsa man na?
DRAYBER  SA  HABALHABAL : Mamalik  tas  atong gigikanan  sa  Baryo Maribago kay  wa man mag-ulan didto.
ONYOT : Butangi, lima pa kilometrong  balikon!

DILI MAPUNIT

SISOY  : O,nganong nagpanglingolingo  kaman  diha,Klo?
OKLO  : Nakakita  kog  wan tawsan  pesos,Bay  kaganiha.
SISOY  : Unya, nganong wala  man nimo  punita?
OKLO   : Mao nay  lisod.
SISOY  : Ngano man?
OKLO  : Unsaon  man nako  pagpunit  nga gigunitan pa  man  sa  tag-iya!

MASAKIT

BOTOY : Undangi  ang pagpanigarilyo.Kyo  kay  makahatag  sakit.
TAKYO : Unsa mang sakita?
BOTOY ; Kanser  god.
TAKYO : Ang pag-inom  sa  ilimnong  makahubog?
BOTOY : Aw, sa kadugayan masakit sab ka  anag  olser!
TAKYO : Mao ra na?
BOTOY : Aw, masakit  ang imong atay  sa  sobrang inom.
TAKYO : Mao ra.
BOTOY : Duna pa  diay?
TAKYO : Duna,pero makaayo.
BOTOY : Yamat ra,unsa man kana  nga makaayo man hinuon?
TAKYO : Sa sige nimong inom mahimo kang maayong danser  ug singer. Inig  kahubog kanta nya mosayaw  pa!
BOTOY : Butangi!

LAIN UG GUSTO

IDOT       : Wala  koy suwerte  niining bag-ong tuig,Bay Andoy.
ANDOY  : Ngano man?
IDOT       : Buwag  nami  si Ibyang.
ANDOY  (Nakurat) :  Yamat ra? Sus,nganong mabalaka ka man,naay  daghan!
IDOT       : Naa bitaw..Pero, naguol ko kay ikeha  kong Ibyang.
ANDOY   : O, nganong ikeha kaman ni Ibyang,may nagpahipi pa sigurong  gusto  diha  nimo.
IDOT        : Duna,Bay. Duna  gyuy  gusto.
ANDOY   :  Da, lagi. Aw, oki  magbalik  na lang   mong  duha.
IDOT         : Dili  na,Bay ,pero  may gusto lagi siya.Mao nay  akong nagul-an.
ANDOY    : Libog pod  ta  ana,Bay  da. Unsa man diay  iyang  gusto?
IDOT         : Gusto  niyang mabalik  ang singsing  nga  among kinuptanan  god.  Nya tua pa ra ba akong giprenda.
ANDOY    : Ngeeh!