ANG HANGYO

PONYONG  : Kumosta ang bag-o mong trabaho,Bay Onyot?
ONYOT        : Da,walay  ayo  tong akong amo,Bay Ponyong  uy!
PONYONG  : O,ingon ka nako nga maayong tawo tong  tawhana  kay gidawat  ka dayon niyag trabaho?
ONYOT        : Maayo lagi unta.
PONYONG  ; Nya nganong naunta man?
ONYOT       : Sayon ra unta kog hangyo niya,nya iya man dayon kong  gipalagpot nuon  sa  akong trabaho.
PONYONG ; Yatis ra. Unsa man diay imong  hangyo niya?
ONYOT      : Ako ra siyang giingnan  kagahapon   god  nga  mopayel  lang kog '  bekisyon  leb', iya man dayon kong  gipayer awot!
PONYONG : Butangi!

PROSPESYONAL RANER

TAKYO; Beliba nakong Elmer ,Bay Asyong uy, kay daghan kaayong nadawat  sa iyang pagka propesyonal  nga raner.
ASYONG : Tinuod  gyud na ,Bay Takyo. Pero dili ko  niya  mobelib  nga usa siya ka propesyonal nga raner ,Bay Takyo. Adto  kong belib ni Otoy.
TAKYO : Yamat ra. Adto ka belib ni Otoy nga wa man gani ko kadungog  nga miapil na siyag lumba  sa dagan?
ASYONG: Bitaw.
TAKYO : Unya, nganong mebileb ka man niya?
ASYONG : Kanunay politika man iyang gidaganan nya labaw pa mas premyo ang iyang makurakot pirme!
TAKYO : Ngeeh,butangi!

BASTA POLITIKO

Nagtapad pagpanglingkod  sa usa ka lingkoranan ubos  sa dakong kahoyng Mangga  nga  daplin  sa  kalsada  ang managhigalang  Abelino ug Pangkoy.
PANGKOY  (Mitudlo  sa mahalong awto nga milabay) : Mao to  Bay Abelino ang awto ni Kongresman   Tabaghak  nga butbotong  politiko!
ABELINO (Milantaw  sa misagirit pagkusog  nga  sakyanan) : Yamat ra,nindot  god  atong sakyanana,Bay?
PANGKOY : Mao  gyud. O, kanang  nagsunod  nga  nindot kaayong awto  nga BMW  sa iya pod    nang  anak!
ABELINO  : Sinaw  god ana,Bay!
PANGKOY : Mao  gyud! O,yuna  kanang misunod  sa  BMW   nga  Ford  sa   asawa  pod  na  sa Kongresman!
ABELINO : Nindota  gyud,Bay  Pangkoy uy. Basta  politiko lagi!
Pagkataudtaod nahiagi  si  Tata nga nagsigeg  yawyaw  nya takulahaw  pod  dayog  katawa.

ABELINO (Mitudlo kang Tata): Unya  Bay Pangkoy , di ba si Tata man na?
PANGKOY : Bitaw,Bay Abelino. Si Tata na kay nabuang  sa daghang  saad  niadtong politiko!
ABELINO   : Butangi!

ANG GISUD-AN

Milisngag  pagsamot  ang ilong ni Ityok sa dihang nasingo ang kahumot sa sud-an  nga bawon ni Antoy.
ITYOK : Lamia  nimog sud-an,Bay Antoy  uy  kay adobo man!
ANTOY : Nganong nahibawo man ka,Yok?
ITYOK  : Ka klaro aron sa baho god.Adobo man ron.
ANTOY : Nya,unsa man sab rong nanimaho mora mag dili masabot?   Ang imo rong sud-an  nga bawon,Yok?
ITYOK : Mao lagi .
ANTOY : Unsa may imong bawon nga sud-an,Yok?
ITYOK  : Aw, USIB  ra  god.
ANTOY : Ha?  Unsa man nang USIB,Yok?
ITYOK  : USIB  god  nga :  Ulo  Sa  Irong  Boang!
ANTOY : Ngeek!

MANANAP NGA BESPRIN

ITLONG  : Unsay besprin  nga mananap  sa taw,Bay Andot?
ANDOT   : Aw, unsa pa  ang  iro.
ITLONG  : Iring,Bay ,uy.
ANDOT   : Ngano man?
ITLONG  : Wa may iring  nabuang!

NAMASIN POD

ONDOY : Pwerteng dakoa na ron  sa premyo  sa lotto, Bay Kalog!
KALOG  : Bitaw,Bay.
ONDOY  : Mopusta ko,Bay basin diayg  akoy makadyakpat.
KALOG  : Duna naman kuno,Bay Ondoy.
ONDOY  : Aw, duna na diay nakadaog?
KALOG  : Kuan  ba, duna nay nabuang pag-inapas ug pinusta!

PAIT GYUD

Nag-inom  ang duha ka managkompare.
TAKYO :  Pre,sige  pa  ta  ani,duna pay duha ka  botelyang 'kabayo" nga akong gi-order!
BOLDOG : Pait na kaayo,Pre.
TAKYO    : Unsa goy pait, nga pagkatimgas nga imnon  anang ber!  Inom pa ta!
BOLDOG : Pait na lagi kaayo,Pre. Na, basaha ra god ning teks   sa  akong asawa  nga  si Ibyang...
TAKYO  (Midungaw  sa selpon ni  Boldog.Mibasa sa teks): Basahon kuno ni nako,Pre  bi , "Kon di ka moundang dihag inom, apason tika dihag  kulata!Unsa man paabuton pa ko nimo?!"
BOLDOG :  Di ba pait gyud kaayo,Pre?
TAKYO : Ngeek!