MURA SAB

BOKOT : Sunod tuig,Bay mao na  nang ilang giingon nga ,year of the monkey.
SITOK   : Unsa man kahay mapaabot anang tuig  sa mga unggoy,Bay no?
BOKOT : Aw, nagkadaiya lang gihapon,Bay  dunay debuynas ug duna sab ing demalas. Ug, aron mahilayo sa mga demalas kinahanglan ang mga palihi...
SITOK   : Unsa may maayong  mga palihi,Bay?
BOKOT : Kay tuig man sa mga unggoy, kinahanglan nga duna kay dekorasyon nga mga hulagway sa unggoy,mga pigorin sa unggoy ug uban pa nga kabahin sa unggoy.
SITOK   : Ikaw,Bay duna na ana?
BOKOT : Aw, duna na? Unya, ikaw pod,Bay kinahanglan nga aduna sab ka ana.
SITOK   : Wala nay kinahanglan,Bay Bokot.
BOKOT : Ngano man,Bay?
SITOK   : Suwerte ron namo ang sunod nga tuig kay ang nawong sa akong asawang maldita mura man sab ug unggoy!

BIRTDE

OLOY   : Na unsa tos Emok, Bay Antoy  nga nagyawyaw man to gikan dinhis  inyo?
ANTOY: Dire lagi to,Bay kay  nangayo ug pinaskohan...
OLOY   : Unya?
ANTOY: Akong gipasabot nga kanang Disyembre 25 mao kanay adlaw sa atong Manunubos. Nga sa ato pa, iyang birtde maong  may madawat gyud na siyang binertdihan, di ba?
OLOY   : Unya?
ANTOY: Unya, niari man siya nako kay nangayog regalo?
OLOY   : Unya?
ANTOY: Unya, kanang Disyembre 25, nga Pasko iya diay pod nang birtde?
OLOY   : Butangi!

ANG NADAWAT

ARYANG: Unsa may nadawat nimong pinaskohan gikan ni pare Toming,Mare?
KADYA  :  Mao man gihapon,Mare kay  'bread and butter'
ARYANG: Katam-is diay,Mare.
KADYA  :  Ikaw diay,Mare?
ARYANG: Da, halang kaayo ang akong nadawat gikan sa kanahan kong bana!
KADYA(Natingala) : Unsa goy halang,Mare?
ARYANG  : Iyang gisilian ang akong baba ,Mare  kay di kuno ko mahilom sigeg yawyaw ang anang pinaskohan.
KADYA    : Butangi!

WALA DIAY

ITOK : Ingong,Tikyo, Bay nga daog man kuno ka sa suwetres?
BOTOY : Kini gyud si Tikyo ang pagkatabian na lang!
ITOK     : Tinuod diay,Bay?
BOTOY : Tinuod bitaw,nya wa diay niya dobleha pagsulti nga daog ko?
ITOK     : Ang unsa,Bay?
ITOK     : Ingon unta siya nga daog ko,'daogdaog'  ba!

DILI MABUSLOT

Usa ka adlaw niana  nanuroy  si Onyot ug  mga surplas nga mga sinena ug panti sa mga babaye.
ONYOT :  Panti mo diha...panti mo diha mga misis ug mga inday....barato ra kaayo!
TIKYA (Nangutana) : Unya, kanang panti nga imong gipamaligya,Nyot lig-on na?
ONYOT           : Aw, syempre!
TIKYA             : Giunsa man nimo sa pagsiguro bi?
ONYOT           :  Mabuslot na lang ang sul-oban ning pantiha ,kining panti dili pa!
TIKYA             : Ngeeh!

WALA MAGKASINABOT

Sa wala pa molakaw si Don  Anoy mipahimangno kini sa iyang suluguon nga si Tikoy.
DON  ANOY : Kon naay mangita  dinhi ,Tikoy,ingna nga nanglakaw.
TIKOY         : O,Nyor.
DON ANOY   : Kon mangutana kon asa milakaw,ingna nga tua nanimba.
TIKOY            : O,Nyor.
DON ANOY   : Ug, kon  mangutana  pa gyud kon anus-a   mahibalik, ingna  nga hapit na,ug kon makahuwat  papaabota lang. Nakasabot ka,Tikoy?
TIKOY(Naglirawliraw ang mga mata) : O,Nyor.
Sa  dihang nakalakaw na ang Don may usa ka ahenteg tambal ang nahiagi.
AHENTE:  Naa ba mo mister gipamati sa inyong kalawasan sama sa panuhot,sakit sa mga kabukogan, atraytis ug mga rayuma?
TIKOY  (Mitubag  diha luyo sa atubangang gate ) : Nanglakaw na!
AHENTE (Nahibulong sa gitubag) : Ha? Uy, asa man mipaingon?
TIKOY  : Tua man nanimba?
AHENTE ( Naglagot abig gibinuangan) : Nabuang ka?
TIKOY ( Naglagot na sab)                      : Hapit na! Kon makahuwat ka,pagpaabot   diha!

MIKUPOS

TAKYO : Miayon gyud ,Dok sa tambala nga imong gireseta dire  nako kay naayo man ang kabahong nga mitapot dire sa akong tuhod.
DOKTOR  PEKDOT : Aw, maayo hinuon,Takyo kon mao kana.
TAKYO  : Pero,Dok may bad news  .
DOKTOR PEKDOT  : O,unsa man nang maong bad news?
TAKYO  : May lain naman sab nga bukol nga dia dire mitubo sa akong bugan!
DOKTOR  PEKDOT : Unya?
TAKYO  : Wa ko mabalaka  sa bukol,Dok ang giproblemahan ron nako kining siwil  ibabaw sa akong bugan kay  kalit man sab nga mikupos!

NAKASUKMAG

Maoy natangkaan ni Juaning ang iyang bana nga si Montoy  sa pag-abli niya sa pultahan nga ang dagway mapungtanon.
JUANING : O,nganong daw suko man kaayo nang imong dagway, Montoy? Naunsa ka?
MONTOY (Nagpangusmo): Da, nakasukmag kog tawo,Day Juaning didto sa  may eskina!
JUANING : Si kinsa may imong nasukmagan?
MONTOY : Si Etot god.
JUANING : Nganong imo  man gisukmag si Montoy?
MONTOY : Ang ang  nga di nako sukmagon nga iya man kong ginganlan ug magdadaro?
JUANING : Nganong nakasulti man siya niana,Toy?
MONTOY : Ang nawong kuno sa akong asawa morag kabaw!
JUANING (Misinta sa kalagot): Tabaghak  ani! Imo unta tong gikuhaan sa dila aron maamang!

PAREHAS RA GIHAPON

ONIK : Ingon ka kaganiha nga dili ka magpasuhol sa imong inadlaw nga tag dosyentos pesos kay Pasko rong panahona?
ETOT : Bitaw. Libre akong serbisyo.
ONIK : Unya,nangayo man lagi ka nakog dosyentos pesos?
ETOT : Ingon diay ko nimo nga suhol na? Ingon man ko nimo nga para sa akong pamilite.
ONIK  : Butangi!

LAING LORD

TAKYO : Dong Pokloy, basta batang buotan makadawat gyud  sa  grasya ug pinaskohan sa imong mga ginikanan ug kang Lord.
POKLOY (Ang apo): Tinuod ka,Lo? Unya, Lo ngano man lagi na sila Berto ug Botoy mga batang bugoy kadawat man lagi gihapon silag pinaskohan sa lord?
TAKYO  : Aw, syempre.
POKLOY: Dili man na sila mga buotan,Lo?
TAKYO  : Bitaw,pero dili man sab buotan ang ilang ,lord kay pulos man mga druglord  ang ilang mga ginikanan!

IYANG TATAY RA

TIKYA: Pagbinuotan gyud,Antoy aron ka  makadawat  ug pinaskohan ni Santa Klawos karong Pasko.
ANTOY(Nagpangawot sa ulo): Di na ko motuo anang Santa Klawos,Nay,uy.
TIKYA (Nahibulong) : Uy,ngano gong nakasulti ka man ug ingon niana,dong Antoy?
ANTOY   : Hikit-an ko man god si Santa Klawos kagabii,Nay.
TIKYA    : Uy, diin god?
ANTOY  : Diha god  sa inyong kuwartong Tatay kagabii,nag-ilis  sa iyang purol!
TIKYA    : Ngeek!

MAY GRUPO NA

Giduol ni Eboy  si  Ano  sa dihang nag-inusara na lang kining naglingkod atbang sa ilang giimnan nga lamesa  sa tindahan ni Nang Peling.
EBOY : Unsa, man Bay Ano ako kang ipasakop  sa among praternite?
ANO (Nakuyawan): Yamat god. Unsa man nang inyong praternite,Bay Eboy?
EBOY                    :  Alpa Brabo maoy ngalan sa among praternite,Bay.

Pero  takulahaw  lang mikalit sab pagtunga si Isyot nga midip-ig kang Ano diha sa iyang kiliran.
ISYOT : Dire pagpasakop sa among praternite,Bay Ano kay lig-on kaayo mi.
ANO (Nakuryoso) : Unsa may ngan  nianang inyong praternite,Bay Isyot?
ISYOT(Miigham)  : Ehemmm! Ang ngan sa among prat  kay Tul-id Bawog!
ANO (Nakapanglingolingo): Sori na lang ninyo,Bay kay duna naman koy grupo ron.
EBOY  : Unsay ngan sa imong praternite,Bay Ano?
ANO    : SFC.
ISYOT : Unsa man nang SFC,Bay Ano?
ANO    : Mao nay gitawag,Bay  ug  Single  For  Christ !

GRUPO

Pagkakita ni Burdigoy  kang  Onyot iya  dayon kining gikumbinser.
BURDIGOY  : Unsa man,Nyot, gusto  kang magpasakop  sa among grupo?
ONYOT         : Unsa man nang   inyong grupo,'Goy?
BURDIGOY  : Ang  among  grupo gitawag nig mga  gardiyans!
ONYOT         : Yamat ra.
BURDIGOY  : Lagi!
ONYOT         : Kadungog naman kon anang grupoha,'Goy.
BURDIGOY  : Unya, magpasakop kana namo,Yot?
ONYOT         : A, di lang ko,Goy, uy. Duna naman sab koy grupo nga giapilan ron.
BURDIGOY  : Unsa god diay? Unsa man nga grupoha?
ONYOT         : Gitawag  man ning among grupo  ug perental gardiyans!
BURDIGOY  : Ngeeh!

SOBRANG DAGINOT

NYOR  INTING : Maayo kay imong gituman ang akong mga pahimangno ninyong Tarsiyana nga magdaginot ta dinhi sa panimalay  Enok.

ENOK   : Amo gyung gituman,Nyor,uy!

NYOR INTING : Maayo, kon mao kana.

ENOK                : Kon maligo mi si Tarsiyana  amo gyung isawod  sa planggana ang among kinaligong tubig para among gamiton sa pagpamisbis  sa mga tanom...ang masobra didto namo gibutang  sa pansayan.

NYOR INTING (Nalipay) : Kana ,gyud! Unya dili diay mo magbilin para  hugas   sa  akong sakyanan?

ENOK                : Malimtan  usahay,Nyor,pero oki lang.

NYOR INTING : Nganong  oki ra man?

ENOK                : Amo man sang gitigom ni Tarsiyana,Nyor ang among ihi ingkaso hutdan sa among kinaligo di naa miy ikahugas sa imong sakyanan!

NYOR INTING : Butangi!

MAGDAGINOT

Mipahimangno si  Nyor Inting  ngadto kang Tarsiyana nga  bag-on  nilang "katabang" sa panimalay, usa ka adlaw niana.
NYOR INTING : Magdaginot ta dinhi sa panimalay,Tarsiyana.
TARSIYANA    : Unsaon man nato sa pagdaginot,Nyor?
NYOR INTING : Ayaw pasigaa ang suga kon may kahayag pa o, kanang motikyop na gyud ang kagabhion. Tingbon ang tanang  labhunon kon maggamit ug wasing masin,ug labaw sa tanan dili usik-usikan ang pagkaon...
TARSIYANA    : Oo,Nyor.
Nianang pagkasunod   adlaw...
NYOR  INTING : O, nakapangompra  na diay ang inyong Senyora sa gamit dinhi sa kosina kaganihang buntag?
TARSIYANA     : Wala pa man,Nyor.
NYOR INTING   : Kagahapon pa kong kakita nga wala nay sulod kining gisudlan sa mga totpik dinhi sa lamesa,unya karon  halos  katunga naman lagi ning ania?
TARSIYANA      : A, kana,Nyor?
NYOR  INTING  : Diin man ni?
TARSIYANA       : A, kana,Nyor kadto nang akong mga nagamit nga nadala nako sa  akong kuwarto,akong gibalik diha sa sudlanan kay ingon man ka nga magdaginot ta dinhi sa panimalay.
NYOR  INTING (Ingon sa natuk-an) : Butangi, kabayong  bakang!