LAIN ANG MIKAON

Maoy  nabatasan nga sa matag "adlaw sa mga minatay" mag-andam ang pamilya nila ni Andang ug Edot sa mga pagkaon nga ibutang sa ilang altar.
EDOT  : Sige,Dang butangi unya rig daghang mga pagkaon ibabaw sa altar aron mabusog gyud tong mga kalag nila ni anhing Tatay Polen ug Nanay Sinda kon mangari to dire. Unya,butangi sab ug bahal kay human nilag pangaon ganahan kaayo tong motungab si Tatay Polen.
ANDANG : Daghan naman nang mga pagkaon diha,Dot dili  na makahurot sila si Tatay Polen ug Nanay Sinda ana uy.
Tuod man  nianang pagka-ugma sa paghimata nila ni Edot ug Andang ,nahurot gyud ang mga pagkaon  nga ilang gihalad diha sa altar.
EDOT : Puwerte gyung gutoma tawon nilang Tatay Polen  ug Nanay Sinda ,Dang kay hurot man  ang mga pagkaon.
ANDANG : Bitaw,Dot no?
TAKYO ( Ilang anak nga nakadungog sa ilang gipanagsultihan): Hurot god tawon nga ang ato mang iring banbanon maoy mihabhab sa mga pagkaon diha?
EDOT (Nakalitan) : Aw, unsa god  diay? Unya,nganong wala man  nimo badlunga?
TAKYO  : Unsaon man nako pagbadlong,Tay  nga nahubog man pod hinuon ko sa bahal.
EDOT     : Butangi!

ANG NAMATYAN

Sulod sa sementeryo nagkauban sila si Intoy ug Simo  sa pagduaw sa lubong sa ilang higala nga dugay nang mitaliwan nga si Oldok.
INTOY ( Milingi sa kilid nga lubong): Kining babayhana nga nia ning lubong rip gyud maoy namatyan niini,Bay Simo.
SIMO   : Nganong nahibawo ka man,Bay Intoy?
INTOY : Naa o,ibabaw sa krus,gibutangan ug RIP.
SIMO   : Yamat ra.(Milingi sab sa kilid nga lubong). Unya,kining lubong nga nia sab sa akong kilid  nga lalaki may ngalan ani unya gibutangan man sab ug RIP ibabaw sa iyang krus?
INTOY   : Aw, rip sab maoy namatyan ana,Bay?
SIMO     : Lalaki,unya ripon ug patyon?
INTOY  : Unyag,girip gyud na ug gipatay kay nahibaw-ang bayot diay,mosupak   gyud ka nga naa man na gibutang ibabaw sa iyang krus?
SIMO     : Butangi!

LIBRE POD

Gisukmatan ni Sitok ang iyang uyab nga si Masang usa niana ka sayong buntag.
SITOK : Pagkawala na gyuy ayo niining atong relasyon karon,Sang,uy.
MASANG (Natingala): Nganong nakasulti kaman sa ingon ana,Tok?
SITOK   : Wala diay ka kahibawo sa mga tabi karon nga mikatap sa atong mga kasilinganan...?
MASANG : Unsa man diay nang mga tabia,Tok  ba?
SITOK      : Duna may nakakita nimo nga mikupot sa sampot sa usa ka lalaki sa dihang nagtrabaho ka sa Mall.
MASANG : Unsa ? Kay ngano man, unsa may daotan ana,Tok?
SITOK       : Kuha  mog  ngano,nga ikaw may nahimong sumsoman ron sa mga balhibuon ug baba!
MASANG  : Uy, Tok parti ra baya na sa akong trabaho ha.
SITOK       : Unsa man diay imong trabaho ron,Sang?
MASANG  : Hibawo ka nga usa ko ka promodayser sa usa ka bran sa mga brief  sa mga lalaki.
SITOK        : Unyag promodayser,magkupokupot diay ka sa sampot sa lalaki?
MASANG  : Uy natural na kay libre man sab  ang demo!
SITOK       : Gibahak na!

LIBRE DEMONSTRASYON

TEKLA : Unsa man diay imong trabaho ron,Mare sugod niadtong namatay ang imong bana nga si Pare Etot?
TIKYA  : Ayda, nag promodayser ko karon,Mare sa usa ka bran sa kondom.
TEKLA : Mao ba? Unya,Mare nganong nakit-an man lagi kang Minyak nga atong silingan nga gikan kuno sa usa ka motel sa Siyudad?
TIKYA : Aw, kadto,Mare, ay sus pagkahimantayon gyud anang Minyak. Wala toy kaso,Mare,uy.
TEKLA : Ngano man diay to,Mare?
TIKYA  : Nag-demo  lang ko,Mare sa kondom ngadto sa akong kustomer  sulod sa motel.
TEKLA : Butangi!

BAWOS-BAWOS RA

POLOY : Motuo ka anang panultihon,Bay nga kon,'labayon ka sa imong kaaway ug  bato baslan mo sab kinig labay  ug pan?'
TIKYO  : Karong panahona lisod nang katuhoan na ,Bay.
POLOY : Ngano man?
TIKYO  : May panultihon man sab nga  nag-ingon, ' ayaw buhata sa imong isigkaingon  ang dili mo gustong  buhaton usab nila nganha kanimo!
POLOY : Butangi!

BAWOS

ONTOG  : Dunay panultihon nga nagkanayon," kon labayon kag bato sa imong kaaway,baslan mo kinig  tinapay." Pasumbingay nga kon buhaton man gani kag daotan sa uban inay batokan suklian mo kinig kaayo.
BOTOY  : Aw,siguro mao na.
ONTOG  : Unya, nganong sa dihang gilabay kang Kuryot ug bato,gibaslan man sab nimog  bato inay tinapay?
BOTOY  : Unsay iyang pagtuo nako adunahan, nga tinapay gyud maoy akong ibawos niyag labay bisan gakutoy ning akong tiyan!
ONTOG  : Ngeek!

TAAS UG UTONG

ABET     : Kadtong akong Lolo, kon mao na gani toy mosawom sa dagat dugay gyud kaayo tong motunga.
CRISPO :  Wala ra na sa akong,Lolo Bay kay kon mosawom gani to molimahon gyud ka oras una to motunga!
OLOY    : Uy,panghilom  gani mong duha na,wala  ra  nang inyong Lolo sa akong Lolo kon sawom na gani maoy hisgotan.
CRISPO : Ngano man diay,Loy tong imong Lolo?
ABET    : Kay taas diay tong utong,Loy?
OLOY    : Taas mo lang! Kay sa ka taas sa iyang utong panagsa na lang god siyang motunga sa ibabaw!
CRISPO : Yamat  ra.
OLOY    : Sa gidugayon niyag  sawom balikbalik ilawom sa dagat kay nakapa'ag  ra gyud siyag trabaho.
ABET     : Unsa may napalgang trabaho,Loy  sa imong Lolo?
OLOY    : Siya nay tigkompra para sa tindahan sa Insek nga tua na magpuyo didto!
ABET     : Butangi!

KUHAAN

Usa ka higayon niana gidala ni   Ontoy ang iyang kabit nga si Rosanna sa  rental  house nga iyang gipanag-iya sa Marigondon.
ROSANNA  : Morag nakaanhi naman ko dinhing dapita,Toy. Di ba paabangan man ning maong balay?
ONTOY       :  O,Bitaw. Daghan man ganing mga foreigners  ang miagig abang niining maong balay kay gawas nga hamugaway ang lugar nindot  pa gyud ang iyang lanskip.
ROSANNA  : Da, lagi gyud. Niadtong una sa dili pa ta uyab gidala ko dinhig usa ka Kano,naunsa ba sa among pagkahubog nanghagis man  siya. Wala man god siya kahilabot nako kay may menstruation  man ko adto mao tong nasuko. Daghang nangabuak, ug siguro dako gyud to siyag nabayran sa mga butang nga nangadaot!
ONTOY     : Aw, diay ba? Aw, para nako kon ikaw poy mahubog ron,unya magwala bisan daghan ug mabuak wala nay problema.
ROSANNA: Dili ko kasiguro ana,Toy, uy.
ONTOY      : Nganong nakasulti  ka man ana?
ROSANNA : Unyag imong dedaksiyonan  kon  mangayo nakog datong nimo?
ONTOY      : Ngee!

WALA MAKIT-I

ANTOY : Kining mga politiko bisan unsa na lang ang ilang gihimong gimik ron alang sa ilang paglansar.
MAYOK : Bitaw,Toy. Makapalibog gyud.
ANTOY  : Niay ubang politiko, moingon   nga atong ipadayon  ang "daang  matuwid", unya makalibog kaayo.
MAYOK : Dihang dapita naglibog nako ana,Toy.
ANTOY  : Ngano man?
MAYOK : Wa man na nako makit-i bisan haing mapa?
ANTOY  : Butangi!

DILI KAHIMO

SIMOY : Kon ang usa ka babaye moabot na kaniya ang walay gana ug  dili na makahimo pagpanganak,unsay tawag ana,Kyo?
TAKYO: Sayon. Mao nay gitawag ug menopos.
SIMOY : Unya kon sa lalaki nga dili na makahimo pa kay nawad-an  na sa gana?
TAKYO: Aw, kana? Mao nay gitawag ug mikopos!

TATO

Si Etak nga maoy giilang maldita ug borukinta sa ilang dapit sa eskina Dugso  miadto kang Junal aron magpahimu'g tato o patik   sa iyang lawas.
ETAK  : Magpahimo kog tato,Nal kilid sa akong bat-ang.
JUNAL(Nakalitan): Yamat ra. Unsa may atong i-tato?
ETAK                    : Tigre ug rabit.
JUNAL                  : Aw,kana lang diay,sayon ra na. Kon magpapatik ka nakog mananap ang bayad ana tag usa ka libo matag usa.
ETAK (Nahingangha) : Ka mahal god? Way barato diha?
JUNAL                        : Aw, makakuha kag barato unya makadiskawon ka pa basta laing klase sa mananap ang akong i-tato diha sa imong bat-ang.
ETAK  : Aw, kana maoy maayo,unsa man nang mananap nga imong i-tato nako?
JUNAL:  Bitin ra god nga molikos  sa tibuok nimong bat-ang ug bilahan.
ETAK  : Butangi!

SUD-AN DIAY

Paghiabot ni Senton nga gikan nagguna sa bukid nangutana dayon kini kang Ebyang kon unsay ilang sud-anon.
SENTON( Giabot nag kagutom); Byang ,unsa may atong masud-an diha? Gutom na kaayo ko,Byang.
EBYANG ( Bag-ohay pang nahigmata gikan sa hataas-oras nga katulog): Aw, naa man,Ton.
SENTON : Unsa man lagi?
EBYANG: USB  ra man nang naa diha.
SENTON : Unsa man nang USB?
EBYANG: Ulo  sa buwad ra god.
SENTON : Butangi!

LAIN ANG MITUNGA

OTIK : Kanang akong Tatay kon mosawom sa dagat,usa ka oras una motunga sa ibabaw.
OPLOK : Yatis ra. Pero, wala ra na sa akong Papa kay  kon mosawom siya sa dagat tulo man ka oras una siya motunga.  Unya,managhoy pa!
SIDOY : Panghilom mo diha,uy! Hambog baya ninyo sa inyong Papa. Wala ra na sa akong Papa niadtong iyang pagsawom sa dagat uy.
OPLOK : Ngano man diay,Doy?
OTIK     : Pila man diay ka oras una siya mitunga sa ibabaw,Doy sa iyang pagsawom sa dagat?
SIDOY  : Ang akong Papa nga misawom sa dagat usa ka oras wala pa mitunga,hangtod na tulo ka oras,hangtod na lima ka oras,unya nianang pagka-ikaunom nga oras mitunga na.
OPLOK : Imong Papa,Doy?
SIDOY  : Dili.
OTIK    : Unsa man diay?
SIDOY : Ang tobol gikan ilawom sa dagat!

HANGYUON

SEBYO : Nganong naputol man ang tiil ni Ontong,Bay Kulas?
KULAS : Giputol sa doktor,Bay kay nakalamay naman ang iyang sakit nga dayabetes.
SEBYO : Mao ba. Unya,wala lang diay niya hangyoa ang doktor aron dili siya maputlan sa iyang tiil?
KULAS : Unsaon man niya sa paghangyo?
SEBYO : Aw, puwede bang ilisan na lang ang iyang sakit ug hayblad aron dili maputol  ang iyang tiil!
KULAS : Butangi!

MAG-ABOT GIHAPON

POLDO : Kon imo kong sugton,Day Etak mag-abot ra gihapon ta.
ETAK    : Unsaon man nato pag-abot nga lagyo man kaayo ang masigkaprobinsya nga atong gipuy-an? Ikaw, taga Leyte  unya ako  taga  Cotabato?
POLDO : Wa lagi nay problema,Day Etak mag-abot ra gihapon.
ETAK    : Unsaon man?
POLDO : Mag-abot gihapon ta kon maminyo na. Ang ang man sab kon mag-iyahay tag balay!

MOMAHAL

KARYO(Mitudlo sa  milabayang sakyanan): Nindotag bag-ong sakyanang SUV sa imong silingan nga si Pidot,Bay o
PRANSING : Bitaw,Bay. Hayahay ang kinabuhi.
KARYO       : Unya,palit ug imo,Bay. Daghan ka man ug yuta baligya aron ka makapalit ug ingon niadto.
PRANSING : Dili ko,Bay,uy.
KARYO       : Ngano man?
PRANSING : Ari lang kos yuta.
KARYO       : Ngano man?
PRANSING : Ang sakyanan sa madugay kay modaan mabarato o madumot. Unya, ang yuta sa madugay momahal man ug dili  madunot!
KARYO       : Ngee!

MAGPABUANGBOANG

TAKYO (Pagkakita sa higala): Uy, nakagawas na diay ka gikan sa mental ospital,Bay Etot?
ETOT    : Nakagawas na gyud,Bay kagahapon  lang.
TAKYO: Unya, unsa may plano nimo ron nga mobalik kas  imong trabaho sa pagpanindag lastiko?
ETOT    : Dili na kinahanglan,Bay.
TAKYO(Nahibulong): Ngano man?
ETOT    : Mobalik na lang gyud  kos mental kon magsigeg yawyaw ang akong asawa!

LUTONG-DAAN

Maoy naabtan ni Okoy sa dihang nahitangka na siya sa pultahan sa ilang balay si Takya nga nagyawyaw.
OKOY   : Uy, Takya ngano god nga nagyawyaw kaman  diha?
TAKYA:  Kinsay di magyawyaw ani nga wala man tay lung-agon kay wala man ka mohatag nako para ipalit ug bugas!
OKOY  : Kadto diayng gihatag ko nimo kagahapon nga ipapalit ug bugas,hain naman diay to?
TAKYA: Da, akong gipusta sa lotto .
OKOY  : Pastilan,mao diayng wala na tay makaon ron?
TAKYA: Da, kabanha ba nimo kon midaog pa kos  lotto di man gihapon ta maglung-ag.
OKOY   : Unsa may atong kan-on?
TAKYA : Ngano mag magpalit tag lutong-daan.
OKOY   : Unsyan na ni uy! 

MA O RA GIHAPON

BOSYO : Di ba giingnan ko ikaw,Dong Nasyo nga buwad maoy palita didto sa tindahan  ni Akay?
NASYO : O,Tay.
BOSYO : Unya, nganong kini mang sardinas maoy imong gipalit?
NASYO : Si Tatay baya,uy nga isda man gihapon na naa sulod sa lata.
BOSYO : Butangi!

KOMEDYANTE KUNO

ISYOT   : Komedyante diay ko kaayo,Bay kay nakakatawa man si Pedot sa akong estorya.
ONDOY: Komedyante ba?
ISYOT  ; Kadto diayng mikatawa man to siya  kaganiha?
ONDOY: Wala man to maminaw sa imong estorya, diha man to magtan-aw sa imong nawong!
ISYOT  : Ngee! 

MAY HASANG

TIKYO  : Ngano man nang isda,Bay Poldo nga makaginhawa man sa ilawom sa dagat?
POLDO : Ang ang kay duna may hasang!
TIKYO  : Unya,duna lagiy hasang pero nganong dili man makaginhawa  sa ibabaw?
POLDO : Ang-ang kay wala may dagat (Midakol kang Tikyo). Uhm!
TIKYO  : Aguy, sakit sa akong ulo uy nga imong gidakol,Bay Poldo.
POLDO (Naglagot) : Sige,pangutana rog usab kay butangan kog hasang nang imong liog!
TIKYO : Butangi!

PULOS BASURA

ASYONG : Kon sa usa ka pananglitan modaog ka sa pagka mayor, Brad Mukloy motabang kaha ka  nako nga mausab ning akong pait nga trabaho ron?
MUKLOY(Naghunahuna) : Siguradong makatabang ko nimo,Brad.
ASYONG (Naikag) : Yamat ra. Karon nga usa ko ka basurero kay magsige man kog panguhag basura kon mobotar ko nimo ug  modaog ka, unsa may ihatag mo unya kanakong trabaho?
MUKLOY : Sayon. Karon kay imong trabaho manguha mag basura,inig ka daog nako ikaw na pod maoy tiglabay sa mga basura!
ASYONG :Ngeek!

PATAY GIHAPON

Maoy tugon sa Manedyer ngadto kang Bodok nga kon mahiabot  na si Ignoy paadtuon kini diretso   sa iyang opisina. Ug, sa dihang nahiabot na si Ignoy.
BODOK  : Bay Ignoy nagtugon ang atong manedyer nga palahuson ka ngadto sa iyang opisina.
IGNOY (Nahibulong) : Ngano man,Bay?
BODOK : Ambot,Bay wala ko makahibawo adtoa  lang didto kay nagpaabot to nimo...
Nagdaling miadto si Ignoy sa opisina sa ilang manedyer sa ikaduhang andana.
IGNOY(Paghitangka nga nahiabot na): Si-Sir imo man kuno kong gipatawag? Ngano man?
MANEDYER : Kini bang imong batasan nga magsige lang ug ka-leyt,unsa man ni dili gyud ka mausab ana?
IGNOY   : Nga-Ngano man diay god,Sir ?
MANEDYER : Niadtong miaging semana sa imong pagka-leyt nangatarongan ka nga namatay ang imong ugangan maong na-leyt ka sa pag-abot.
IGNOY : Tinuod to,Sir.
MANEDYER : Sa miaging adlaw, na-leyt  ka na sab kay namatay ang inyong silingan.
IGNOY     : Tinuod man gihapon na,Sir.
MANEDYER: Unya, karon na-leyt ka nasab sa pag-abot! Unsa, duna na sab namatay ?
IGNOY   : Duna gyud,Sir.
MANEDYER : Kinsa naman sab ang namatay,Ignoy?
IGNOY  : Patay ang akong relo,Sir, wala na ko kahibawo sa  saktong oras!

.

PALIHI

Hangtod niining mga panahona si Noy Binoy nga usa  sa labing tigulang nga nagpuyo sa ilang Baryo sa  Tagimtim  nagsunod gihapon sa mga patuo-tuo nga maoy ilang "namat-an ug kahayag"  gikan sa ilang mga katigulangan. Usa ka higayon niana...
NOY BINOY (Nangutana  ngadto sa iyang apo): Dong Intoy nakaadto ka ba didto sa baybayon?
INTOY   (Gikan nga nanginhas  sa baybayon): O,Lo gikan pa ko didto kay nanginhas.
NOY BINOY : Maayo hinuon. Dako diay karong hunas?
INTOY           : O,Lo.
NOY BINOY : Kon mao, mahimo na diay nakong itanom kadtong ubi nga akong gitagoan sa suwambi kay hunas man kaha? Kon hunas gani ang dagat ,kon magtanom ka, maayo na nga palihi,Dong.
INTOY (Nahibulong ): Pastilan,Lo dili mahimo.
NOY BINOY (Natingala sab) : Nganong dili man mahimo?
INTOY   : Na, kon magtanom ka karon nga hunas,unsaon na lang inig taob sa dagat ibanlas ra pod!
NOY BINOY : Butangi!

NAAPIL

Nabalikbalik na lang sa iyang agi si Takyo sa pagpunayg pangutana kon asa dapita niining Sityo Pug-ok ang balay sa iyang higala nga si Onyot, apan wa gyud niya kini mapalgi. Hangtod nga sa iyang pamasin nakasugat siyag tawo nga nagkamuritsing ang lawas niini sa hugaw.Nagkaguhayguhay ang gisul-ob niining sinena.
TAKYO ( Namasin sa pagpangutana) : Bay,nakatultol ka kon hain ni magpuyo si Onyot Daginot nga bana gani ni siya ni Dabiana Tambok?
TAWO ( Misiga ang mga mata.Unya,mingisi): He-He, wa-wala ko  kabaw,Bay  kay buang ko...
TAKYO (Naglagot) :Aw, maila man sa imong dagway!
TAWO  (Nasuko  sab) : Aw, maila man imong nawong,hastang  buang apilon man nimo sa imong pangilad!

KLASMET DIAY

Mipahimangno si Andat sa iyang anak nga si Tikya usa ka adlaw niana.
ANDAT : Dili ko gustong mag-apil-apil ka anang uyab-uyab ,Tikya ha,samtang nag-eskuwela ka pa.
TIKYA   : Moundang na lang ko,Nay.
ANDAT (Nahibulong): Uy,nganong moundang ka man hinuon sa imong pag-eskuwela?
TIKYA  : Ingon man god ka nga dili ko paapilon bahin anang uyab-uyab.
ANDAT : Tinuod na. Unya?
TIKYA  : Unsaon man ana,Nay  nga klasmet man nako ang akong uyab ron.

ANG NAKASALA

TIKYO (Masuk-anon) : Nganong gipatawag man ko sa prinsipal sa inyong eskuwelahan,Banoy? Unsa man nakasala ka na sab didto?
BANOY : Wala,Tay, uy.
TIKYO   : Ayg  pamakak,ha? Lintian ka gyud nako ron!
BANOY : Wala lagi,Tay.
TIKYO   : Unya, nganong gipatawag man ko sa inyong prinsipal?
BANOY : Aw, basin ikaw tingale ang may sala,Tay!