SAYOP PAGSABOT

BOTOY( Nagyawyaw  samtang naligo): Pastilan niini Minda nagpalit kamag shampoo nga  dili man ni mobowa  sa tubig?  Unsa man ning hitaboa,pailisdi  ni  didto  sa tindahan ni Bibeth!
MINDA(Miduol  sa bana nga naligo) : Uy, amaw tan-awa  ra god unsaon man pagbowa niining shampoo  nga  imong gigamit nga  wala pa man na mabasa  ang imong ulo?  Amaw ka?
BOTOY( Nangawot  sa ulo): A,kining shampoo maoy  way klarong instraksyon. Di basaha kuno.
MINDA(Mibasa)                 : Good For Dry Hair!   Toink!

GITUYO

Labihang nakatagawtaw  ni Inse Minang sa iyang anak ulitawo  nga si Takyo usa ka udto niana.
INSE  MINANG  :  Pastilan  nimo,Takyo  nganong  sa kadaghan nga mga babaye diha ka paman mangulitawo  anang Sinda nga silingan  ra man kaayo na nato!  Wala na gyud  kay laing nahunahunaan, ug makapangita  didto  sa layo?
TAKYO               : Pastilan  sab nimo,Nay,uy.Ngano  man diayg naa kos duol mangulitawo?
INSE  MINANG  : Ay  duol ra lagi kaayo! Di maayo!
TAKYO(Misinghag): Unyag dili ko dinhis duol,ug moadto ko sa layo,mosugot mo?
INSE MINANG       : Aw, kana maoy maayo.
TAKYO                    : Bantay bitaw mo kon mangayo kog i-plete dili mo mohatag nako!

MAG-ABOT GIHAPON

ANTOY : Kon  ang  isda nabuhi ra  sa dagat,Bay  Sidoy,unya ang manok nia ra manimuhi  sa atong tugkaran,ug  ang baboy ihalas  tua  sa lasang may higayon  ra gihapon  nga  mag-abot na sila niining umaabot  nga  mga  adlaw.
SIDOY   : Imposible man gyud kaayo  nang mahitabo,Bay. Kanus-a pa kaha nang higayona,Bay  no?
ANTOY : Moabot  ra na,Bay.
SIDOY   : Nus-a  man?
ANTOY : Kon  masulod na sila  sa repridyeritor!

UTRO SAB

Nahibulong si Botyok nga nakita niini ang iyang anak nga si Tikyo nga masulub-on ang dagway.
BOTYOK   : Nganong masulub-on  kaman,Tikyo  nga gikan sa inyong eskwelahan niining hapona?
TIKYO       : Gikasab-an ko sa among maestra,Tay.
BOTYOK   : Nganong gikasab-an kaman sa inyong maestra? Unsa may hinungdan?
TIKYO       : Iya  man god kong gipangutana kon asa nang Magellan's  Cross?
BOTYOK   : Unya,wa diay ka mahibawo?
TIKYO       : Wa,Tay.
BOTYOK(Milabtik sa dunggan sa anak): Sus  ka bugo gyud nimo,Tikyo. Kanang  Magellan's Cross
                             syempre  tua gyud na sa may minteryo!
TIKYO        : Toink!

NAKASABOT

Sa  dihang nahibaw-an ni  Botoy ang hinanaling kamatayon sa iyang kompare nga si Andot ( nga nasakit ug hubag nga way buthanan) miadto  dayon kini sa panimalay sa nahauna ug nakigkita kang Tikya nga asawa.
BOTOY (Miduol kang Tikya.Mikawhat sa kamot.Midip-ig.Mihagawhaw): Kongratyolisyon,Mare.
TIKYA (Nahibulong.Misuna) : Di,Pre uy basig  kondolens  maoy imong gipasabot ana?
BOTOY                                   : Kongratyolisyon  gyud na,Mare.
TIKYA (Natingala)                 : Ngano  man,Pre?
BOTOY                                   : Ang ang,Mare nga biyuda ka naman ron.
TIKYA                                     : Unyag  nabiyuda na diay ko karon,Pre?
BOTOY (Mikidhat sa komare): Aw,dugay naman sab kong nabiyudo!
TIKYA (Mikidhat sa namatayng bana)   : Butangi!

ILUGAR

Hilabihang nakatagawtaw  ni  Kakang  kay naaktohan gyud niini kadtong guwapahong babaye nga isakay na unta ni Tikyo diha  sa  front seat  sa gidrayban niining  multicab. Nagpangusmo ni sa kalagot  nga  gikumot ang dughan  sa labihang selos.
KAKANG  :  Mao diay,Tikyo  nga di gyud ko nimo kanunayng  iuban kon mamasahero ka kay duna man diay  kay laing  isakay sa  front seat! Ka  animal gyud nimo,Tikyo,uy! Palekiro ka kaayong dako sa mga babaye! (Tagawtaw  ni Kakang).
TIKYO (Nangatarongan gihapon): Pastilan,baya nimo, Kakang uy  ang imo lang gyung pagka selosa!
KAKANG    : Selosa god tawon nga ako man gyung nakita tong bayhana.
TIKYO         : Mauwaw ta sa mga pasahero  tawon,Kang  o  nga  nakadungog,hilom diha. Kon magselos gani ka ibutang  sa lugar.
KAKANG(Namuwa ang mata sa kalagot): Na hala pahunonga ning multicab ,lugar diha sa daplin kay hapsan tika ning dala kong binugha!
TIKYO     : Toink!

NAGDALI (Unang hugna )

Gumikan kay hapit na ma-late  sa iyang pagsulod sa klase igo na lang nag-ampo si Ompok pamasin nga duna pay paagi  aron di mahitabo ang iyang gihadlokan  nga   magtagawtaw ang ilang Magtutudlo.
OMPOK(Usa ka kimpang): Diyos ko,hatagi pa tawon kog dugang kusog nga makusogkusog ko ning akong paglakaw...
Apan sa dihang hapit na siya moabot sa ganghaan sa ilang classroom  nadakin-as ni, ug nahaligid sa daplin.
OMPOK(Nakapangagho): Ho! Lord, ayaw na lang kog itukmod niana bitaw ko sa duol.

KINSAY SAD-AN ?

Nag-abot sa opisina ni Kapitan  Oming sila si Otik ug Isyot aron sutaon kon si kinsa man kanila maoy sad-an sa usa ka aksidente.
OTIK : Kini si Isyot mao gyuy sad-an,Kap kay ang iyang kabaw maoy mibangga sa akong dyip dihang kalit kining milabang sa kalsada kagahapon sa udto didto sa may simangan sa Buyong.
KAPITAN OMING : Tinuod na,Isyot.
ISYOT                     : Tinuod na,Kap,pero kini si Otik mao gyuy sad-an kon atong hunahunaon.
OTIK                       :  Nganong ako man maoy sad-an?
ISYOT                     :  Ako nga nagdrayeb sa akong dyip nakahimo gyud sa pag-brik,unya kanang iyang kabaw nga mibangga sa akong dyip duna diay nay brik?
KAPITAN  OMING: Butangi!

NAGLAGOT DIAY

Usa ka gabii niana nga namisita  si Muklong  kang Agida.
MUKLONG : Sugta na tawon  ko,Day  Gids. Pastilan dugaya na baya nakong nangulitawo nimo uy!
AGIDA        : Abi nimo,Klong kon makita ko gani ikaw, feeling  ko, I am the happiest  person when I saw your face.
MUKLONG ( Wa makasabot) : Unsa may buot ipasabot ana,Day Gids?
AGIDA  : Kun binisay-on na,Klong mao nay giingon nga kon makit-an ko gani nang imong nawong malipay gyud ko.
MUKLONG (Nalipay): Ngano man,Day Gids?
AGIDA                        : Nindot kaayong gabson kanang boti  sa imong nawong,Klong!
MUKLONG                :  Ngeeh!

MANANAMBAL

Usa ka nabantog nga tambalan nga nahimutang sa nahalayong bukid sa Kanturatoy maoy nahunahunaan ni  Ontoy nga maoy iyang adtoon aron patambalan ang iyang sakit nga gihambin. Tuod  man dili na lang nato tas-on ang estorya ,naabot si Ontoy sa maong tambalan nga ang ngalan mao si Ingko  Botoy .
ONTOY : Gibantog  kang maayong laki nga tambalan,Yo didto sa among dapit ngani daghan ang nakaila  nimo bisan pa man wala pa sila makaanhi niining imong halayong puluy-anan.
INGKO  BOTOY : Ang tinuod daghan nang nagpatambal dire nako,Dong Ontoy ug silang tanan nangaayo pinaagi  lang sa akong paghalok sa dapit  sa ilang lawas nga adunay balatian.
ONTOY : Kon mao kana,'Yo siguro kong maayo nimo kining akong hubag. Tagaan tikag singko mil ka pesos kon imo ning maayo ang akong sakit.
INGKO BOTOY(naghinamhinam): Way problema na,Dong. Asa dapit ang imong hubag kay akong hagkan aron maayo dayon.
ONTOY : Dia man,'Yo  miturok ilawom sa akong lubot.
INGKO BOTOY (Nangulihad): Pwee! A, bahala pag  diyes milon nimuo'g  hatag, di gyud ko mohawok anang imong lubot nga nabaho sa kagid!
ONTOY : Butangi!