GIKATLAN

Usa ka buntag niana maoy nahiagian ni Bitong  ang higala niini nga si Tiboy nga naghinuktok diha sa ilang may hagdanan.
BITONG (Mitimbaya): Naunsa  ka,Bay Tiboy nga sayo kaman kaayo nga naghinuktok diha?
TIBOY(Nangilkil sa iyang kalawasan):  Gikatlan ko,Bay  Bitong wala koy maayong kinatulgan sa miaging  gabii.
BITONG(Nahibulong): Uy,ngano man,Bay?
TIBOY                       : Nangatol  ang among kalawasan,ug gihapsan pa gyud kong Tatay Ciano  ug lipak sa kawayan.
BITONG                   : Pastilan no!  Ngano, unsa mang  hitabo-a,Bay Tiboy?
TIBOY                      : Gisugo  man god kong Tatay Ciano kagabii ug pangutang  ug Katol  didto  sa tindahan ni Nang Bebeth,unya dili man siya magpa-utang,mao tong duna koy nahunahunaan...
BITONG                   : Unya,unsa man tong imong gihunahunaan?
TIBOY                      : Mao  To,Bay kay  wala may Katol nga para sa lamok nagkuha na lang kog tanom nga daghan ug dapaw ug maoy akong gipaaso sa among balay.Puwerteng sukoa ni,Tatay Ciano!
BITONG                   : Ngano man?
TIBOY                      : Tabang  mog ngano nga kaming tanan wala makatulog kay pulos gikatlan sa dapaw!Nagsige na lang mig pangawot sa among lawas kay hilabihan ka katol!
BITONG                   : Butangi!

GIPUN-AN

MUKLONG (Misudya): Kon hawod ka pa sa Karate,Bay Tikyo nganong midagan kaman lagi sa inyong kombate ni Sebyo kagahapon?
TIKYO (Maulawon): Alkanse ko,Bay, maayong  maningamot si Sebyo  mao tong nakahunahuna  kog laing paagi kagahapon...
MUKLONG : Unsa man kadtong paagiha?
TIKYO         : Aw, ang akong nahibaw-an  nga KARATE ,gipun-an ko na lang ug "L".
MUKLONG : Mao diayng  Mi-karatel ka na lang ug dagan.
TIKYO         : Mo lang!

NAILAD

BUDOY   : Ara  mang hinanoka nimo kagabii  nga natulog,Tong.
BITONG  : Mao gyud,Doy.
BUDOY   : Wala na diay ka lamoka? Kanunay  ka man gong moreklamo nga daghang  lamok,unya di ka makatulog...!
BITONG  : May paagi nako,Doy.
BUDOY   : Unsa man kanang paagiha?
BITONG  : Akong giilad ang mga lamok.
BUDOY   : Yatis ra. Ilad god? Giunsa man nimo pag-ilad ang mga lamok  bi?
BITONG  : Nagpasumangil kong natulog  ilawom sa moskitero,pero sa dihang nasulod na ang tanang lamok,da ako bitawng gisirad-an wa na hinuon sila makagawas!

MANIMAWOS

Gibatig  dakong kahibulong niining sayong kabuntagon si Otoy  dihang iyang nakita ang iyang igsuon nga si Mukloy nga nanguyat-ag  sa ilang  mga sinena nga gipangbitay  sa may hayhayan ug gipangutingkay ang mga nagtipun-og nga labhunon ug mga kagamitan diha sulod sa ilang panimalay.
OTOY  : Naunsa  ka diha,Noy Mukloy nga imo mang gipangkuyat-ag ug gipangutingkay nang atong mga sinena diha ug ang ubang mga butang?
MUKLOY(Gipaningot sa gibuhat): Naglagot ko,Dong!
OTOY     Kinsa may imong gikalagotan,Noy MUkloy?
MUKLOY : Naglagot kos  daghan kaayong lamok nga nia dinhis  atong balay.Kay wa gyod ko makatulog kagabii!
OTOY       : Unya,Noy?
MUKLOY : Aw,karong buntag nga ilang tingkatulog ako pod silang tugawon!
OTOY       : Butangi!

UNSAY NAKANINDOT?

ONTOY  (Nanghambog) : Nindot  gyud ning  maapil tag  fun run,Bay  Tikong  kay alegre!
TIKONG        : Nindot god tawon nga dagan man gihapon na.Unsay nakanindot niana bi?
ONTOY         : Duna tay t-shirt unya daghan sab ang managan...
TIKONG        : Nindot untag ang  t-shirt  ipanghatag ug dili bayran.Unya  fun  nga dili na lang modagan aron dili ta kutasan!
ONTOY         : Butangi!

NANGATARONGAN GIHAPON

Mikaratil ug dagan si Ondoy  human niya malabni ang dakong bag  nga gidala  sa usa ka "mahuyang" diha sa may dalan Colon.Apan wa  pa  gani siya  makaliko sa unahang eskina  dali lang sab kining  gisignit  sa usa ka Polis  nga nag-atang nang  daan.
POLIS (Mition  sa pusil  ngadto kang Ondoy): Hunong kon di ka gustong akong pusilon niining dala kong  armas!
Tuod  man mihunong si  Ondoy.
ONDOY  : Nganong  imo man kong gipahunong,Sir?
POLIS     : Nanglabni kag  bag didto  sa unahan. Ni-a  ay gi-text  sa kauban kong polis nga paatangan  ka!
ONDOY :  Sayop tingale ka,Sir.
POLIS     : Nganong  nasayop man ko,nga kita ko man nga sitiw  kaayo kang  nagdagan?
ONDOY (Nangatarongan) : Di tawon ako,Sir  uy, nagdagan  ko kay apil man  kog fun run!
POLIS    : Ngeeh!



Paapas: Ang pulong "mahuyang",nagpasabot  dinhi ug bakla o bayot(In English, a gay).

MAO NA NI RON

Tungod sa labihang kapungot ni Tikyo  nga wa gyud magpakabana  sa pagbayad  si Karyo  sa iyang utang nakahukom kini nga iyang ipatawag si Karyo  sa Kapitan  sa ilang Baryo. Tuod man, dihang nagkaatubang na ang duha didto sa barangay  hall gihusay  silang duha  sa Kapitan.
KAPITAN  : Tinuod  ni Karyo  nga nakautang ka ngadto ni Tikyo,ug  wa gyud ka magpakabana  sa pagbayad niini  nga dugay  naman diay ni kaayong maong utang?
KARYO     : Tinuod na,Kap.
TIKYO(Misakgaw.Nagtagawtaw.Gitulisok  si Karyo): Buang ning tawhana,Kap  kay di gyud  mobayad  sa iyang utang dire nako nga dugay na!
KARYO ( Mikalit kasuko): Ikaw maoy buang!
TIKYO  (Misamot  kalagot): Ikaw maoy buang kay ikaw maoy utangan nako?
KARYO(Medyo mikalma)  : Ikaw  gyuy buang hibawo ka bitawng wa pa koy sapi sige kag paningil!
KAPITAN    : Butangi!

DAKOG KAON

Piyesta  sa baryo Kanturatoy. Usa sa daghang mamistahay niining maong dakong kasaulogan karon mao ang nabaniog nga   dakog kaon nga si Pontoy.
PONTOY (Mitimbaya sa nasugatan niyang higala): Way pakal didto sa inyoha,Bay Sidoy?
SIDOY    : Wala man koy hikay  karon niining piyestaha,Bay.
PONTOY : Sige  na lang.
Milakaw  si Pontoy sa unahan ug didto nahiagi  sa balay sa lain niyang amigo nga si Odog.
ODOG (Mitimbaya. nga nagbarog sa ilang may bentana sa balay): Pamista  dire,Bay Pontoy   sa amoa!
PONTOY (Malipayon): Maayo  ni da(sa hilom). Unsa man mosaka nako diha sa inyo  aron mamista?
ODOG   : Aw,kon mamista ka,Bay balik lang unya karong palis kay wa pa man maluto ang kan-on ug ang sud-an!
PONTOY : Butangi!

DILI MAKAHIBAWO

Diha  kilid  sa usa ka  swimming  pool nangutana  si Ondoy  sa   tawo nga iyang gikatapad.
ONDOY  : Unsay  trabaho mo dinhi,Bay?
TAWO     : Lifeguard   man ko dinhi,Bay.
ONDOY  : Aw, laypgard  diay  ka dinhi,Bay.
TAWO    :  Mao gyud ,Bay  ug duha mi ang ni-a dinhi.
ONDOY : Unya, kon simbako  dunay malumos nga maligo dinhi  sa swimingpol kamo maoy  moluwas?
TAWO    : Mao gyud na. Pero ako ray moluwas.
ONDOY : Kadtong  usa ka laypgard  unsa man diay to?
TAWO    : Look out lang  to,Bay  kay dili man makahibawong molangoy!
ONDOY : Ngeeh!

BRAYT KUNO

TIKBOY  : Ingon  ni Masong, bright man kuno ka,Bay, aber duna koy ipangutana  nimo makatubag ka ba kaha  pod niini?
ETOT      : Pangutana kay atong tubagon.
TIKBOY : Kanang tulison  diha nga magsakay  ug eroplano,unsa may tawag ana,Bay?
ETOT      : Sayon. Mao nay gitawag  ug hijack!
TIKBOY : Kanang tulison nga magsakay  sa  iyang sakyanan,pananglit diha  sa iyang awto o sa magsakay ug dyip?
ETOT      : Sayon. Mao nay gitawag  ug  carjack!
TIKBOY ; Mao . Unya, kanang babaye   nga tulison  nga mag-inusara lang ug hubag  pa gyud kaayog sampot  nga mag-ikid-ikid  sa paglakaw ?
ETOT      : Sayon. Kana kay  gustong  tulison,mao nay gitawag ug  torjackon!
TIKBOY : Butangi!