MATIGBAK RA POD

SIKOY ( Nangisusi): Kumosta naman ,Bay Roncat ang imong pagpahimalad ug pagpatagna didtos Cordova?

RONCAT : Maayo ra man,Bay.Didto ko gihapon  niadtong giadtoan nakong Mananagna kay makatag-an man gyud sa mga panghitabo dire nako.Daghan nang higayon.

SIKOY(Miigham):Hmmm,aw mao ba?

RONCAT : Bitaw,Bay. Sagol nuon kabalaka ug kalipay akong gibati ron.

SIKOY: Ngano man,Bay? Unsa naman pod ang iyang gitagna diha nimo nga mahitabo?

RONCAT : Matod pa niya ay,dunay akong higala nga motraydor hinapos nining tuiga.Ug,sa sunod tuig may tulo sa dagkong butang nga akong gi-wish matuman gyud!

SIKOY (Nahigalam nga namati):A,yamat ra?Tinuod na,Roncat?

RONCAT : Aw,basta sa tanan niyang gitagna dire nako sa mga minglabayng mga katuigan natuman na!Ang iya karong gitag -an sa umaabot man sunod tuig,2025!

SIKOY : Aw,matuman siguro na?

RONCAT : Mao nay paabuton pa.

SIKOY : Unsa man pod nang tulo ka-wish nimo nga matuman kon maohon?

RONCAT: Ang Manalagna nag-ingon,nga naa may motraydor karon nako,ang wish sa sunod tuig matuman maong makalipay,pero nabalaka sab ko!

SIKOY (Nakuyawan): Ha,ngano man?

RONCAT : Ang mi-traydor nako karon, sunod tuig kay matigbak man! Atakihon!

SIKOY(Nagkurog): Hoy,simbako uy!

RONCAT : Butangi!

UNSAY PASABOT?

TEACHER EMMA: Asa na ang imong homework,Pekto nga wala ka man magsumiter?

PEKTO(Nagkabungabunga sa pagtubag)K-kining,ku-kuan,Mam.

TEACHER EMMA : Mangita ka nasab ug katarongan ron kon nganong wala ka mag-homework?

PEKTO:Kuan man god,Mam…

TEACHER EMMA: What is the reason,Pekto?

PEKTO: T-tungod lagi sa homework,Mam….k-kining…

TEACHER EMMA: Answer me,Pekto!

PEKTO : Because of the homework,Mam…

TEACHER EMMA(Giabot og kalibog): What?Then ,what is homework?

PEKTO : HOMEWORK,Mam. 

TEACHER EMMA: Yes,go ahead.Tell me!

PEKTO: HOMEWORK is “Half Of My Efforts Wasted On Random Knowledge!”That is HOMEWORK!

TEACHER EMMA: Ngeek!

PAABOTON NA LANG

 TORYANO : Kon dili man gyud kapungan nga moulbo ang giyera,Koy tali sa Tsina ug Taiwan ,unya molasik ang kagubot dinhis atoa,unsa may imong buhaton?

 MUKLOY : Aw, wala.

 TORYANO: Unsa? Unya, dili diay ka motago?

 MUKLOY : Dili na pareha niadtong  Ikaduhang Gubat,Toryano nga duna pay daghang dapit katagoan ug mga gaang sa atong kabukiran nga kapahipian niining panahona ron. Nahawan na!

 TORYANO: Unya, mag unsa naman lang diay ka,Kloy?

 MUKLOY : Aw, paabot na lang.

 TORYANO: Unsa may imong paaboton?

 MUKLOY : Paaboton na lang nakong baseyo sa ilang mga bala nga mangatagak,aron akong unyang ipatimbang,makasapi pa ko!

 TORYANO: Ngee!

KINSA KAHA?

 TAKYO : Hapit naman gyung eleksyon sa barangay, Toy nakapili ka na kon si kinsa maoy imong botohan pagka Kapitan ug sa mga konsehales?

 IKTOY : Wa pa,Kyo. Naghunahuna pa ko.

 TAKYO : Unsa pa may imong gihunahuna  nga hapit na ra ba.

 IKTOY : Mao lagi. Kinsa kaha?

 TAKYO: Kinsa ba?

 IKTOY : Ang dagkog hatag!

 TAKYO : Butangi!

WA KASABOT

 TORYANA ( Midip-ig  sa  dughan ni Botoy): Toy (sa paraygong tingog),hayag kaayong buwan no?

 BOTOY (Mihangad sa itaas): Aw, o buwanon man karon,Tors.

 TORYANA(Mitimang ug laing estorya): Abi nimo,Toy no, kanang atong silingan  ba nga bag-ong nag-abang sa ilang abangan ni Donata,labing kaayo.

 BOTOY(Mitingkag ang dawonggan): Ha? Mao ba? Nganong nakasulti kaman ana nga labing na sila?

 TORYANA: Nakita man god nako nga sa matag gikan anang lalaki padulong sa trabahoan,mohawok una nis aping sa iyang asawa. Unya,inig balik-uli na pod gikan sa trabahoan maoy akong masigpatan dinhis atong balkon nga kanang lalaki may itunol nga tsokolit sa iyang asawa.

 BOTOY: Hala kanindot god!

 TORYANA(Mihapuhap sa may pondyohan sa bana): Unya,Toy makahimo ka ana?

 BOTOY ( Nakalitan): Ha! Dili ko uy!

 TORYANA( Mikalit pagsinghag): Nganong dili ka man makahimo ana bi?!

 BOTOY (Kahilakon): Uy,Toryana unsay imong gustong mahitabo nga ipapatay ko nimo sa iyang bana!

 TORYANA: Ngeeh!

MAKALINGKOD MAN

 BOTOY : Nganong wala man  ka modayon paglansar isip konsehal sa atong baryo,Bay Abyot?

 ABYOT: Nakahunahuna kos tambag sa  akong asawa,Bay nga si Margarita.

 BOTOY: Unsa mang tambaga niya,Bay Abyot?

 ABYOT: Dili gyud kuno ko makalingkod nga konsehal ,Bay.

 BOTOY: Yamat god? Sa paglingkod lang? Imposible god ana!

 ABYOT: Nganong imposible man,Bay? Makalingkod gyud diay ko?

 BOTOY : Mo lang! Kadaghang lingkoranan diha sa opisina sa atong baryo!

 ABYOT: Butangi!

MAOY SAKTO

 TAKYO: Naunsa ka,Bay Atoy nga galuha man nang imong mga mata?

 ATOY: Nangasaba nako  si Juliana,Bay Takyo.

 TAKYO: Si Juliana nga imong asawa? Yatis ra,nganong gikasab-an ka man kuno niya?

 ATOY : Nabuak naman god  nako ang among alkansiya sugod ning pagpangampanya  sa umaabot nga eleksiyon. Unya ingon siya nga walay kasiguroan ning akong paglansar!

 TAKYO : Mao ba? Unsa goy walay siguro,nga klaro man kaayo na.

 ATOY (Misaya ang dagway) : Aw, siguro gyud diay,Bay Takyo? Sigurado gyud kong makalingkod pagka konsehal dinhi atong barangay?

 TAKYO: Murag sakto,Bay.

 ATOY: Mao lagi,sakto gyud ko nga milansad ug modaog gyud ning eleksiyona karon sa barangay?

 TAKYO: Dili,Bay. Si Juliana mao gyuy insakto nga  nga dili gyud ka makadaog!

 ATOY: Yay!