NAGDUWA RA

Mipahimangno si Don Antoy sa iyang kulukadidang nga  si Margie nga  dili pasudlon si bisan kinsang tawo nga mosulod sa giabangan niining  apartment  alang  sa siguridad  niini. Apan, mao na lang ang nahibaw-an ni Don Antoy nga misumbong kaniya ang guwardiya nga may gipasulod  si Margie nga usa ka tawo.
DON  ANTOY  : Tinuod ba,Day Margie nga may gipasulod kang  tawo samtang wala ko dinhi? Kinsa man to?
MARGIE (Nagkabungabunga sa pagtubag): K-kining,k-kuan to,Darling Antoy higala ra god.
DON ANTOY : Mao ba? Unya, nag-unsa man to dinhi?
MARGIE         : Da,laay kaayo,Darling  uy nagduwa ra god mi.
DON ANTOY (Nakalitan): Ha? Unsa may inyong giduwa?
MARGIE  : Da, duwa ra god  ug siyatong!
DON ANTOY: Aw, abi ko bag nagduwa mog kalayo masunog  unya ning  apartment!
MARGIE        : Ngeeh!

MIKOPOS

Minghoy ang bayhon ni Andot dihang naabtan sa ilang panimalay sa higala niini nga si Tikyo.
TIKYO : Mora mag huyhoy ang abaga,Bay,dunay problema?
ANDOT: Duna gyud,Bay.
TIKYO : Yamat ra. Unsa man nang problema mo kay atong tabangan sa pagsulbad...
ANDOT: Pait na gyud kon matiguwang na ta,Bay.
TIKYO : Ngano man?
ANDOT: Di na gyud molihok  ang atong gana. Mopid-ok na lang kanunay.
TIKYO  : Bitaw. Kon sa   babaye pa,Bay mao nay gitawag nilag  menopause.
ANDOT ; Mao diay na,Bay. Unya sa mga lalaki,unsa man?
TIKYO  : Aw,gitawag sab  nag 'mikopos'    parehas   anang sa imo!
ANDOT : Na,patay!

KADA BAGTING RA

SIKOY : O,Bay nia ka diay? Kanus-a  kaman nahiabot dinhi sa atong dapit  gikan sa Negros?
KOING: Kagahapon sa buntag,Bay.
SIKOY : Miundang ka diay sa imong trabaho didto sa imong agalon nga Haciendero?
KOING : Niundang ko,Bay.
SIKOY  : Matod pa nimo niadtong kataposan natong panag-estorya nga hayahay man ang imong trabaho didto?
KOING : Tinuod na,Bay. Mobarog lang god kog mokaon basta kon mobagting na.Kada bagting ,kaon!
SIKOY  : Yamat ra,unya nganong miundang kaman lagi?
KOING : Mahimo na nimo nga sa usa ka adlaw ka usa ra man mobagting>
SIKOY  : Unya?
KOING : Aw, kon di ko mamatay sa kabusog,mamatay tingale  ko sa pasmo!
SIKOY  : Butangi!

DILI MAOY TAG-IYA

Maoy naabtan ni Takyo ang higala niining  si Medyong nga naghinuktok diha sa ang-ang sa ilang hagdanan   nga kawayan.
TAKYO (Unang mitimbaya): Bay Medyong ,musta na? Unsa may problema nga naghinuktok man?
MEDYONG  : Dunay problema,Bay.
TAKYO        : Dako gyud nang problemaha  tingale kay  naghinuktok mag maayo!
MEDYONG  : Dako gyud,Bay.
TAKYO         : Unsa man nang problemaha,Bay mahimo bang masayran.
MEDYONG  : Mabdos lagi ang akong uyab nga si Toryana,Bay.
TAKYO         : Diay ba? Aw, siguro gyud nga ikaw maoy tag-iya anang iyang gimabdos ron kay uyab man mo?
MEDYONG  : Mao nay na-problemahan  ko ron,Bay.
TAKYO        : Ngano man?
MEDYONG  : Makapamabdos diay ko nga 'birokon'?
TAKYO         : Ngeeh!

NABUGHAT

Nagpatambal si Eyok kang Oldok nga usa ka albularyo.

OLDOK (Albularyo) : Pasidan-an ko ikaw,Eyok  sa dili una pagkaon sa mga isda nga dunay himbis. Likaye una ang pagkaon niini kay basin mabughat ka.
EYOK   : Akong tumanon na,Noy Oldok.
Apan  nianang pagkasunod adlaw nahibalik si Eyok ngadto sa iyang gipatambalang albularyo nga si Oldok nga giyayongan na sa usa ka duyan kay maglisod  na kini sa paglakaw.
OLDOK (Albularyo) : Di ba nagpasidaan man ko nimo,'Yok nga ayaw una pagkaon sa mga isda nga dunay himbes aron dili ka mabughat?
EYOK  : Bitaw,Noy.
OLDOK (Mibasol):  Unya, tan-wa anin ron o, nga nabughat man ka. Nikaon ka siguro sa mga isdang dunay himbes?
EYOK   : Wala man ko kahinumdom nga mikaon,Noy Oldok.
OLDOK: Wala god? Unsa man diay imong gikaon?
EYOK   : Sardinas ra man tong  akong gikaon.

DUHA DUHANG MATAKTAK

Dunay pasidaan si Don Ignoy ngadto sa iyang guwardiya nga si Ontoy.

DON IGNOY : Duna koy ipasidaan nimo,Ontoy ug mao gyud ni tumana aron dili ka mataktak sa imong trabaho dinhi sa akong panimalay.
ONTOY          : Unsa man na,Nyor?
DON IGNOY  : Ayaw pagpasulod dinhi sa akong mansiyon  bisan si kinsa samtang wala pa ko dinhi.
ONTOY           : O,Nyor.
DON IGNOY   : Maayo kay nakasabot ka. O,sige molakaw nako.
Tuod man milakaw si Don  Ignoy kauban sa iyang drayber nga si Inggot kay miadto sa Siyudad. Paglabay sa pipila ka oras nahibalik kini ug maisugon kining nangita kang Ontoy nga  guwardiya . Sa pipila ka gutlo nga pinangita kang Ontoy,nakit-an ra gyud kini.
DON IGNOY(Mitulisok kang Ontoy): Nagsulti ko nimo,Ontoy nga walay pasudlon dinhing tawo bisan si kinsa samtang wala pa ko dinhi, di ba?
ONTOY (Abtik nga mitubag): O,Nyor.
DON IGNOY  : Unya, nganong gipasulod man nimo  kadtong babaye nga ginganlan  ug Marjorie dinhi sa akong mansiyon ? Wala diay nimo hinumdomi  ang akong gipasidaan kanimo?
ONTOY (Nagpitokpitok ang mga mata): Nahinumdom  man,Nyor. Diha man gani si Senyora Agata sa sala niadtong higayona nga nakasulod ang maong babaye.
DON IGNOY : Unya?
ONTOY          : Laliman ka ana,Nyor nga namugos man gyud ang babaye nga mosulod,ug bahala na kunog magpaabot siya nimo sa may guardhouse.
DON IGNOY  : Unya?
ONTOY           : Akong gipasulod,Nyor uy.Lalim ka ana nga matod pod niya basta kun dili nako siya pasudlon,mosinggit siya!
DON IGNOY   : Yamat god! Unya?. Unsa man kunoy iyang isinggit?
ONTOY            : Mosinggit siya,Nyor   nga imo kuno siyang 'kabit', basta dili nako pasudlon. Puwerte nakong kuyawa ,Nyor ug sa  akong kahadlok, akong gipadalidali ug pasulod  uy!
DON IGNOY   : Butangi! Kanay guwardiya!

MAO GIHAPON

Nagpangusmo sa kalagot si Ontoy sa dihang nahiagi si Andot diha sa ilang may tugkaran.
ANDOT (mitimbaya): Uy, Bay Ontoy 'musta? Naunsa ka man?
ONTOY  : Naglagot kong Sikoy, Bay Andot kay iya kong gidaot ngadto sa akong uyab.
ANDOT  : Mao ba? Giunsa ka man sa pagdaot ni Sikoy ngadto sa imong uyab,Bay?
ONTOY  : Iyang giingnan ang akong uyab nga mao diayng sige kog sul-ob ug itom  nga sinena kay  adik kuno ko!  Animal gyud ning tawhana!
ANDOT  : Mao ba? Unya,Bay unsa may imong gihimo nga giingnan ka man nga kon sige kag sul-ob ug  itom nga sinena kay adik ka?
ONTOY  : Aw, nagsul-ob na pod kog puti kanunay,Bay. Pero, animal gyung dako...!
ANDOT  :  Ngano  naman sab?
ONTOY  :  Giingnan  naman sab kong, puti nga adik!
ANDOT  :  Butangi!

DILI PUWEDE

Puwerteng lipaya ni Takyo nga gihatagan ni Sebyo nga iyang ig-agaw ug selpon nga bag-o pa lang nahiuli gikan sa Japan isip maoy sinugatan.
TAKYO : Salamat kaayo,Gaw Sebyo nga imo kong gihatagan ug selpon. Karon pa gyud tawon ko makapanag-iyag selpon,Gaw.
SEBYO  : Way problema,Gaw. Ikaw kay may selpon kana puwede kanang makigteks ug mga dalaga ana para makauyab kana.
TAKYO (Inosente pod): Aw, diay ba,Gaw. Unya,puwede na kaha?
SEBYO : Puwede na kaayo god.
TAKYO :Si Paciencia unta maoy gusto kong panguyaban,Gaw.
SEBYO  : Way problema na,sige teksi si Paciencia ug diskartihi  dayon nga nakagusto k aniya...
TAKYO  : Dili lagiu puwede,Gaw.
SEBYO(Nahibulong) : Ngano man?
TAKYO : Wa may selpon si Paciencia!
SEBYO  Butangi,aw pasensya na lang,Gaw!

HADLOK MABIYAAN

Nakamatikod si Oyang nga subo kaayo ang panagway sa iyang amiga nga si Aryang.
OYANG : Naunsa man ka,day Aryang nga subo man kaayo nang imong nawong niining sayong kabuntagon? Naunsa ka?
ARYANG : Naguol ko sa gisulti ni Oldok dire nako,Yang.
OYANG   : Si Oldok nga kanang nagulitawo nimong butihon?
ARYANG : O, lagi,'Yang.
OYANG    : Unsa man diay gisulti ni Oldok diha nimo nga naguol ka man?
ARYANG : Matod pang Oldok ,'Yang nga kon dili man gani ko niya sugton mabiyaan gyud ko  sa tren.
OYANG   : Unya?
ARYANG : Mao nay nagul-an nako,"Yang.
OYANG   : Nga hibiyaan kas tren?
ARYANG:  Naguol gyud ko,Yang , uy kay asa man ko mangitag tren dinhi sa atong lugar.
OYANG   : Butangi!

WALA MAKLARO

BOTOY : Wa gyud masakpi ang mamumuno ,Bay  bisan pas kuha kuno sa CCTV diha atubangan sa dakong tindahan.
ONGOT : Yamat ra.Klaro man kaha nga nakuha sa CCTV?
BOTOY :  Mao god lagi,ambot nga wala man kunoy klaro.
ONGOT : Ngano man?
BOTOY : Ang-ang nga klos man kuno ang kamera.
ONGOT : Nganong klos man ?
BOTOY : Kana gong giingon nga CCTV: closed- circuit television! Klaro  anang gisirad-an kay klos man!